«Баай Байанайга ыалдьыттааһын»

Бүгүн А.Е.Кулаковскай — Өксөкүлээх Өлөксөй аатынан норуоттар доҕордоһууларын дьиэтигэр «Баай Байанайга ыалдьыттааһын» бырайыагынан бэртээхэй тэрээһин ыытыллар.

А.Е.Кулаковскай —  Өксөкүлээх Өлөксөй төрөөбүтэ 148 сылынан ыытыллар тэрээһиҥҥэ билиини-көрүүнү тургутар викторина ыытыллара, ырыа-тойук дьиэрэйэрэ былааннанар.

Ол курдук, Дьокуускай куорат 13 №-дээх оскуолатын үөрэнээччилэрэ А.Е.Кулаковскай «Байанай алгыһа» хоһоонун бар дьон иннигэр дорҕоонноохтук ааҕыахтара. Салгыы «Булчут эһэкээн кыыһын көрсүһүүтэ» диэн театрализованнай көрдөрүү ыалдьыттар болҕомтолорун тардыаҕа. «Байанай алгыһа» хоһоонтон быһа тардыыны Дьокуускай куорат 17 №-дээх оскуолатын 8 «А» кылааһын үөрэнээччитэ Семен Сергеев ааҕан иһитиннэриэ. Билиини-көрүүнү тургутар «А.Е.Кулаковскай олоҕо уонна айар үлэтэ» викторина ыытыллыа. Маны сэргэ, тэрээһиҥҥэ мустубут дьон СӨ култууратын үтүөлээх үлэһитэ, мелодист Исай Брызгалов «Байанайдыын алтыһыы», «Дьээ-буо» этно-фольклорнай ансаамбыл ырыаларын истиэхтэрэ, «Үҥкүүлээ» өрөспүүбүлүкэтээҕи күөн күрэс финалистара Ирина Рассейкина, Афанасий Колочев үҥкүүлэрин көрүөхтэрэ, булт тиэмэтигэр кэпсэтиигэ кыттыахтара, оһуохайдыахтара, хаартыскаҕа түһүөхтэрэ.

Саха литературатын төрүттээччи Алексей Елисеевич Кулаковскай-Өксөкүлээх Өлөксөй 1877 сыллаахха кулун тутар 16 күнүгэр Таатта улууһугар төрөөбүтэ.

А.Е.Кулаковскай аатынан норуоттар доҕордоһууларын дьиэтин пресс-сулууспата

Айталина Аргунова хаартыскаҕа түһэриитэ