Баайаҕантай Кулан Хаан 2023 сыл тугу түстүүрүн кэпсээтэ

Хас сыл аайы киһи барыта, улаханныын-кыралыын Саҥа дьылтан туох эрэ дьиктини, кэрэни күүтэр. Саҥа үүнэр сыл түүнүгэр, Саҥа дьыл алыптаах түүнүгэр киһи аймах саамай кистэлэҥ баҕа санаатын этэр, үчүгэйгэ, үтүөҕэ эрэнэр. Бары даҕаны бу күүтүүлээх, долгутуулаах кэлэр сыл хайаан да ааһан эрэр сыллааҕар ордук буолуо, кыһарыйыы, хомолто, аймалҕан кэннибитигэр хаалыаҕа диэн эрэнэр. Оттон бу 2023 сыл тугу түстүүрүй, биһиги тугу кэтэһэбитий? Ол туһунан астрология, чараас эйгэ дьоно туох дииллэрий?

Баайаҕантай Кулан Хаан, айылҕаттан айдарыылаах кут-сүр уһуйааччыта, ойуун:

– Сыл түмүктэниитигэр киһи ааспыт сылын анааран көрөн, бүтэн эрэри эргитэн, толкуйдаан түмүктэри оҥостуохтаах. Онно биири өйдүөхтээхпит, бу буол­букка биһиги хайдах сыһыаннаһарбытыгар үөһэттэн көҥүллээхпит. Биллэн турар, чугас киһиҥ эҥин суох буолбут буоллаҕына, сүрдээх ыарахан буолар. Ол да буол­лар, айылҕа сүрүн тутулун өйдөөн, бу орто дойдуга биһиги атаахтаан-таалалаан ааһаары буолбакка, эриллэн-мускуллан, буһан-хатан, күүс булунаары, араас тургутуулары ааһабыт. Ол тургутууну баары баарынан, Дьылҕа Хаан ыйааҕынан, Одун Хаан оҥоһуутунан, туох буолбутунан ылынар кыахтаах буоллахпытына, иннибит диэки барарбытыгар тус бэйэбитигэр чэпчэки буолуо.

Билигин, биллэн турар, олох чэпчэкини күүтэр, кэтэһэр хайдах да табыллыбат. Ол гынан баран, оннук буолуо, маннык буолуо дии-дии умса-төннө түһэр эмиэ төрүт табыллыбат. Хас биирдии киһи ити туох буоларын өйдөөн-дьүүллээн көрүөхтээх уонна сөптөөх, тоҕоостоох быһаарыы ылынан иннин диэки баран иһиэхтээх. Ол иһин билиҥҥи кэм биһигиттэн, барыбытыттан туруктаах буолары эрэйэр. Бука диэн дьоҥҥо сыһыаны көрүнэн, тылы-өһү тардына туттан, куһаҕаны саҥарбакка, дьону үөхпэккэ сылдьыллыахтаах. Билигин уопсастыбаҕа, дьон араас быһаарыныыны ылынар кэмэ кэллэ. Ону сүөргүлээбэккэ, хас биирдии киһи бэйэтин туругуттан, баран иһэр суолуттан тутулуктанан, бы­­һаарыныы ылынан олоҕун суолун талыахтаах. Биһиги биири өйдүөх тустаахпыт, барыта биһиги баҕабыт хоту буолбат. Дьон атын-атыннык толкуйдуур, быһаарыныыны ылынар, ол иһин холкутаан, кэҥээн биэ­­риэхтээхпит.

Бу сылга хайдах даҕаны, туох даҕаны буолбутун иһин, эһиил баччаларга эмиэ үүнэр сылы көрсөөрү үөрэ-көтө сылдьар буолуохтаахпыт. Орто дойду олоҕо диэн оннук, очурдаах, охсуулаах, бэлэми кэ­­тэспэккэ, сымнаҕаска, сылааска эрэ на­­йыламмакка, өбүгэлэрбит олорон кэлбит олохторун салҕаан, олох туһугар туруулаһан, киэҥ көҕүспүтүн буолан, дьоҥҥо үтүө сыһыаммытын ыһыктыбакка, иннибит диэки баран иһиэхтээхпит. Ол буолуохтаах биһиги кыайыыбыт, ол буолуохтаах биһиги инникибит, биһиги сирдээҕи күүспүт, хоту дойду хонноҕор олорон иитиллибит, тыйыс тымныыны кытта өрө тустан үйэлэр тухары олорон кэлбит улуу омук буоларбыт туоһута. Этэҥҥэ буолуоҕуҥ!