Байыаннай дьайыы кыттыылааҕа Василий Афанасьев кэриэһигэр буулдьанан ытыыга күрэхтэһии буолла

Бэҕэһээ, олунньу 25 күнүгэр, Бүлүү улууһугар киинтэн саамай ыраах сытар Үгүлээт нэһилиэгэр биир дойдулаахтара, байыаннай дьайыы кыттыылааҕа Василий Афанасьев сырдык кэриэһигэр буулдьанан ытыыга иккис сылын күрэх бэрт тэрээһиннээхтик буолан ааста. Санатар буоллахха, бастакы күрэх Василий Афанасьев олорбут, үлэлээбит II Күүлэт нэһилиэгэр буолан ааспыта.

Күрэҕи аһар үөрүүлээх тэрээһиҥҥэ Үгүлээт нэһилиэгин баһылыгын солбуйааччы Виктор Федоров, оскуола дириэктэрэ Любовь Ксенофонтова, Василий Афанасьев кэргэнин эдьиийэ Марина Иванова, II Күүлэт нэһилиэгин баһылыга Юрий Спиридонов, Василий убайа Иван Афанасьев, Василийы кытта бииргэ үөрэммиттэрэ — «Саха сирэ» хаһыат эрэдээктэрэ Александр Тарасов уонна Петр Маисов эҕэрдэ тылы эттилэр. Василий Афанасьев туһунан истиҥ-иһирэх тылларынан санаан-ахтан аастылар.

Быйылгы тэрээһиҥҥэ Күүлэт түөрт нэһилиэгэ — I Күүлэт, Тылгыны, Үгүлээт, II Күүлэт хамаандалара кытыннылар. Күрэх түмүгүнэн кыайыылааҕынан Үгүлээт бастакы хамаандата, 2-с миэстэ – II Күүлэт хамаандата , 3-миэстэ – Үгүлээт иккис хамаандата буоллулар. Кыттааччыларга Василий Афанасьев аймахтара, нэһилиэктэр туруорбут, оскуолаҕа бииргэ үөрэммиттэрин ааттарыттан сыаналаах уонна харчынан бириистэр туттарылыннылар.

Маннык тэрээһиннэр ыытыллыылара суолтата үрдээн иһэр. Биир курдук, ыччаты патриотизм тыыныгар үөрэтэр аналлаах. Онтон бу билигин бары өттүнэн наадалаах. Тэрээһин анал байыаннай дьайыы туһунан Бүлүү олохтоохторугар атын көрүүнү, өйдөбүлү хаалларыаҕа, үүнэр кэнчээри ыччакка патриотическай иитиигэ биир хардыынан буолар.

Василий Афанасьев 1999-2000 сылларга ытык иэһин толорон, Тиксиигэ осназка (сибээскэ) сулууспалаабыта. 2022 сыл күһүнүгэр, балаҕан ыйын 28 күнүгэр, мобилизация кэмигэр ыҥырыллыбыта. Ротатыгар урукку идэтинэн радист-разведчигынан сылдьыбыта. ДНӨ сиригэр-уотугар, Угледарга, бойобуой сорудаҕы толоро сылдьан сырдык тыына быстыбыта. «Хорсунун иһин» мэтээл иккис истиэпэнинэн наҕараадаламмыта.