Баан каартатын булан баран…

Дьокуускайга 2 №-дээх полиция отделын дьуһуурунай чааһыгар куорат олохтооҕо дьахтартан сайабылыанньа киирбит.

Быһаарбытынан, кини каартатын сүтэрбит, онтон сотору кэминэн тугу эрэ атыылаһан баран счетуттан төлөөбүттэрин туһунан биллэрии кэлбит. Хоромньу 18 тыһ.солк. тахсыбыт.

Холуобунай ирдэбил үлэһиттэрин суһал-ирдиир үлэлэрин түмүгүнэн, ханнык атыы-эргиэн сиригэр харчыны туттубуттара, ону тэҥэ уорбаланааччы кимэ уонна ханна баара биллибит. Бу Нам улууһуттан төрүттээх урут сууттана сылдьыбыт 34 саастаах киһи буолара быһаарыллыбыт. Ол курдук, бу киһи баан каартатын куорат биир уулуссатыгар булан ылбыт уонна маҕаһыыҥҥа атыыласпытын төлөөбүтэ биллибит.

РФ Холуобунай кодексатын 158 ыст. 3 ч. («Уоруу») холуобунай дьыала тэриллибит.

СӨ ИДьМ пресс-сулууспата