Баан каартатын булан ылаат, маҕаһыыҥҥа сүүрбүт…

Мииринэй оройуонугар полиция дьуһуурунай чааһыгар биир дьахтар баан каартатын сүтэрбитин уонна онтон харчы уорбуттарын туһунан үҥсүбүт. Бу туһунан ИДьМ пресс-сулууспата иһитиннэрэр.

Полиция үлэһиттэрэ уорбут киһини булбуттар. Амур уобалаһыттан сылдьар 27 саастаах киһи баан каартатын булан ылбыт уонна тута маҕаһыыннарга баран, 9 тыһыынчаттан тахса суумаҕа атыыласпыт.

Дьахтар каартаттан харчы устубуттарын билэн баран, тута «хатаан» кэбиспит эрээри, уоруйах номнуо 9 тыһыынча солкуобайы туһана охсубут. Эмсэҕэлээччи тута полицияҕа үҥсүбүт. Полиция үлэһиттэрэ түргэнник хамсаммыттар.

«Уоруу» диэн ыстатыйанан холуобунай дьыала тэриллибит. Бу киһи сууттаннаҕына, 6 сылга диэри көҥүлэ быһыллыан сөп.

Алҕаска баан каартатын булан ылан баран, туһаммакка да илдьэ сырыттахха, «уоруу» курдук сыаналыахтарын сөп. Аныгы кэмҥэ уоруйаҕы түргэнник булаллар.