Баараҕай тутуулар

Дьокуускайга Арктикатааҕы эпос уонна ускуустуба киинэ тутулла турар. Билигин 70% бэлэм буолла. Манна “ВИС” хампаанньа бэдэрээттэһэр тэрилтэлэри үлэлэтэр. Олор истэригэр олохтоох тэрилтэлэр бааллар.

Үлэ-хамнас оргуйан олорор. Дьиэ көҥдөйө бүтэн, биир өттө барыта өстүөкүлэнэн бүрүлүннэ, түннүктэрэ, үрдүгэр үс ураһа куупала турдулар, атриум үрдүгэр өстүөкүлэттэн «күөл» оҥордулар. Билигин ис эркиннэрин туталлар, муостатын оҥороллор. Филармония саалатыгар сыана тутуллан эрэр.

Олус баараҕай, сүҥкэн тутуу буолара харахха быраҕыллар. Манна филармония, икки ты­­йаатыр киириэхтэрэ. 36,7 миэтэрэ үрдүктээх, 33 тыһыынча кв. м иэннээх сиргэ филармоническай, эрэпэтииссийэ­лиир, мультимедийнай, сиэр-­туом оҥоһуллар саалалара уонна үрдүк технологиялаах тыйаатыр саалата баар буолуохтара.

СЫЫППАРАЛАР
Эбийиэккэ барыта
217 киһи уонна
12 тиэхиньикэ
үлэлиир.

Дьиэ үрдүгэр амфитеатр­даах, куораты көрөр уонна сынньанар былаһааккалар баар буолуохтара. Үс саалаҕа 1530 киһи киирэр кыахтаах. Аан дойдуга маннык ураты култуура кластера суох диэххэ сөп.

“Смарт” поликлиника

Пуорт оройуонугар “Смарт” поликлиника – 2-с №-дээх куорат балыыһатын поликлиниката тутулла турар. Тутуу 6 ­этээстээх, 8856 кв. м иэннээх – манна улахан дьон уонна оҕо поликлиникалара, дьахтар консультацията тус-туспа аан­наах буолуохтара. Симиэнэҕэ 600 киһини көрүөхтэрин сөп.

Билигин 90-ча үлэһит, 5 тиэхиньикэ үлэлии сылдьаллар. Ититии киирбит, өстүөкү­лэлэрин, түннүктэрин туруор­буттар. Ис истиэнэлэрин тута, инженернэй ситимнэрин тарда, тас эркиннэрин оҥоро сылдьаллар. Барыта 5520 кв. м бетон ууруллубут. Дьиэ 65%-на тутуллубут.

Билигин 90-ча үлэһит, 5 тиэхиньикэ үлэлии сылдьаллар. Ититии киирбит, өстүөкүлэлэрин, түннүктэрин туруорбуттар.

Саҥа поликлиника Дьо­куускай куоракка биир улахан мэдиссиинэ киинин быһыытынан үлэлиэҕэ. Аныгы мэдиссиинэ тэриллэринэн, миэ­бэлинэн хааччыллыаҕа. Поликлиниканы “ВИС” хампаанньа от ыйыгар тутан киллэрэр былааннаах. Тутуу судаа­рыстыбаннай-чааһынай бииргэ үлэлэһии көрүҥүнэн ыытыллар.­

САНААЛАР

“Хас да сылга мэктиэ биэрэбит”

Сергей Козловскай, “ВИС” бөлөх корпоративнай коммуникацияларга департаменын салайааччы:

– Судаарыстыбаннай-чааһынай бииргэ үлэлэһии көрүҥэ үчүгэйэ диэн, маннык улахан тутууларга өрөспүүбүлүкэ бүддьүөтэ ноҕуруускаламмат. Бүддьүөт бастаан 30-40%-нын төлүүр, уоннааҕытын кэлин биэрэр. “ВИС” хампаанньа анал тиэхиньикэнэн, миэбэлинэн толору хааччыйан, тутан биэрэр уонна хас да сылы быһа мэктиэ биэрэн, инженернэй, тиэхиньиичэскэй өттүнэн хааччыйар. Онон хаачыстыбаҕа кыһаллабыт, эппиэтинэстээхтик сыһыаннаһабыт.

Судаарыстыбаннай-чааһынай бииргэ үлэлэһии көрү­ҥүнэн тутуллар дьиэлэр болдьохторугар тутуллубакка, туран хаалбаттар, тоҕо диэтэр, хампаанньа бэйэтин үбүн укпут буолан, тутан бүтэрэргэ интэриэстээх.

“Чааһынай партнер эппиэтинэһэ үрдүк”

Андрей Суслов, “ВИС” бөлөх Саха сиринээҕи управлениетын бэрэстэбиитэлэ:

– Култуура кластерын технологическай хааччыллыыта, филармоническай уонна тыйаатыр саалаларын акустиката дойдуга биир бастыҥ буолуоҕа. Уһук Илиҥҥэ маннык таһымнаах эбийиэк суох. Ирбэт тоҥҥо улахан тутууну ыытыы бырайыактааһыҥҥа да, ураты технологиялары туһаныыга да кытаанах ирдэбиллэрдээх. Сыбаайалара хамсаабаттарын туһугар, тоҥорор тэриллэрдээх. “ВИС” бырайыактара Дьокуускай маастар-былааныгар киирбиттэрэ уонна нацио­нальнай бырайыак ирдэбиллэригэр толору эппиэттиил­лэр. Төһө да хамсык, сааҥсыйалар мэһэйдээтэллэр, баан бырыһыана үрдээтэр, тутуу тохтообото. Бу чааһынай ­партнер эппиэтинэһэ буолар.

“Хамнастара үчүгэй”

Владик Федоров, штукатур-маляр:

– Оскуоланы быйыл бүтэрбитим, «Заводы Поволжья» диэн бэдэрээттэһэр тэрилтэҕэ киирэн, алтынньыттан үлэлиибин. Үлэ-хамнас этэҥҥэ бара турар, күн аайы истиэнэни штукатуркалыыбыт. Сарсыарда 8 чаастан симиэнэ саҕаланар, киэһэ 8 чааска диэри үлэлиибит. Күнүс аһаталлар. Дьиэм чугас турар, онон сылдьарга бэрт. Элбэххэ үөрэнним. Хамнастара үчүгэй. Бу киин тутуллан бүтүөр диэри үлэ­лиэхпит.

ААПТАР ХААРТЫСКАЛАРГА ТҮҺЭРИИЛЭРЭ