Баарга арыгылаан баран билсибит дьахтара төлөпүөнүн, харчытын уорбут

Дьокуускайга полиция 4-с №-дээх отделын дьуһуурунай чааһыгар олохтоох киһи баарга сылдьан суотабай төлөпүөнүн уордарбытын, счетуттан 11 тыһ.солк. устубуттарын туһунан иһитиннэрбит. Бу туһунан СӨ ИДьМ пресс-сулууспата суруйар.

Холуобунай ирдэбил үлэһиттэрэ эрдэ сууттана сылдьыбыт 35 саастаах дьахтар уорбаланарын быһаарбыттар.

Быһаарыллыбытынан, эмсэҕэлээччи баарга бу дьахтары кытта билсибит, бииргэ арыгы испиттэр. Сотору кэминэн эр киһи баарга төлөпүөнүн умнан баран тахсан барбыт. Ону дьахтар уоран ылбыт уонна «онлайн-баан» көмөтүнэн счеттан харчы устубут. Харчыны тус наадаларыгар бараабыт.

Уоруллубуту төннөрбүттэр. Холуобунай дьыала тэриллибит.