Баатаҕай кырачааннара хорсун буойуттары чиэстээтилэр

Аҕа дойдуну көмүскээччи күнүн көрсө Дьааҥы улууһун Баатаҕай орто оскуолатыгар сэргэх тэрээһиннэр ыытыллаллар. Алын сүһүөх кылаастар үөрэнээччилэригэр олохтоммут үтүө үгэс быһыытынан, Ийэ дойдуга бэриниилээх буолууга туһуламмыт араас көрсүһүүлэр, кылаас чаастара, күрэхтэһиилэр буоллулар.

Бу туһунан алын сүһүөх кылаас учуутала Анна Стручкова маннык кэпсээтэ:

— Эр санааланыы, Ийэ дойдуга бэриниилээх буолууну туоһулуур күнү көрсө сүүстэн тахса оҕо кылааһынан  тус-туспа байыаннай таҥастаах эрчимнээхтик хааман киирэн, бэрт дьоһуннаах хамаандалары толордулар. Манна хас биирдии кылаас оҕото тутта-хапта сылдьарын, сөпкө хамаанданы тутуһан хаамарыттан саҕалаан, биир сомоҕо буолар  түмсүүлээхтэрин  дьүүллүүр сүбэ кытаанахтык көрдө-иһиттэ. Кырачааннар хас биирдии хаамыыларыттан саҕалаан, ырыаларыгар тиийэ ураты кыһамньыларын ууран, хорсун буойуттары хайдах курдук чиэстииллэрин көрдөрдүлэр.  

Ол кэнниттэн 2 «А»уонна 2 «Б» кылаас үөрэнээччилэрэ бэйэлэрин икки ардыларыгар күрэхтэстилэр. Бу күрэскэ  кырачааннарбыт араас түһүмэхтэринэн сымса, түргэн, сылбырҕа буолалларын көрдөрдүлэр. Түмүкэ  2 «А» кылаас бастаата.

Маннык тэрээһиннэртэн үксүбүт төрөөбүт дойдубутугар бэриниилээх буоларга дьулуһан улааттахпыт, эйэлээх олоҕу сыаналыы үөрэннэхпит. Кэлэр нэдиэлэттэн кырачааннар аны сырдык ыраас бырааһынньыкка – аан дойду дьахталларын күнүгэр бэлэмнэнэр түбүгэр түһүөхтэрэ.