Баатараҕа гаас ситимэ тардыллыаҕа

Мэҥэ Хаҥалас улууһун Баатара нэһилиэгэр Ил Дархан Айсен Николаев  сорудаҕынан, быйыл “Сахатранснефтегаз” хампаанньа гаас ситимин тардыахтаах.

—1944 сыл тохсунньу 15 күнүгэр киэн туттар биир дойдулаахпытыгар Федор Кузьмич Поповка Сэбиэскэй Сойуус Дьоруойа Үрдүк аат иҥэриллибитэ. Бу бэлиэ күҥҥэ Ил Түмэн дьокутаата, “Сахатранснефтегаз” АУо генеральнай дириэктэрэ Алексей  Колодезников дьоруойбут дойдутугар Сыымахха тахсан үлэлээтэ.
Бүгүн нэһилиэккэ күөх төлөн ситимэ киириитигэр ыытыллыахтаах үлэ итиэннэ улууспутугар салгыы нэһилиэктэри гаастааһын тула сүбэ мунньах буолла.
Гаас ситимэ кэлиитигэр олохтоохтор миэстэтигэр бэлэм буоларбыт ирдэнэринэн улуус, нэһилиэк салалтата сөптөөх тэрээһин үлэни миэстэтигэр ыытыахпыт. Дьоруойбут дойдутугар быйыл Улуу Кыайыы 80 сылын көрсө өр кэтэспит, туруорсубут үлэбит ыытыллан  нэһилиэк инники сайдыытын түстүөҕэ, — диэн улуус баһылыга Дмитрий Тихонов иһитиннэрдэ.