Баҕа өттүлэринэн көмөлөһөр дьоҥҥо махтанабыт

Бэс ыйын 10 күнүгэр Мария Спиридонова уонна катамаран хапытаана Ньургун Павлов тэрээһиннэринэн байыаннай дьайыы кыттыылаахтарын төрөппүттэригэр, оҕолоругар, дьиэ кэргэттэригэр көмө, өйөбүл быһыытынан хаһыс да сылын лууктааһын тэриллэн, онно баран дуоһуйа сынньанан, лууктаан кэллибит.

Мария Спиридонова, Ньургун Павлов уонна биир санаалаах доҕотторо бу курдук үтүө сүрэхтэриттэн дьоҥҥо көмөлөһөллөрө олус үчүгэй. Мария Ивановна байыаннай дьайыы кыттыылаахтарын оҕолоругар, дьиэ кэргэттэригэр сүҥкэн үлэни ыытар. Араас тэрээһиннэргэ байыастар оҕолоругар бэлэх оҥорууну тэрийэр. Байыаннай дьайыы кыттыылаахтарын огдооболоругар көмө, тирэх буолар үлэни тиһигин быспакка ыыталлар. Араас аһымал аахсыйаларын тэрийэн, киилэр дьиэ кэргэттэригэр харчынан көмө оҥороллор.
Арҕаа хорсуннук сэриилэһэ сылдьар, олохторун дойдубут туһугар толук уурбут буойуттар оҕолоро, дьиэ кэргэттэрэ, төрөппүттэрэ кэнсиэртэргэ, тыйаатырдарга, цииркэҕэ босхо сылдьалларын тэрийэллэр. Ньургун Павлов булчуттартан кус хомуйан, байыаннай дьайыы кыттыылаахтарын кэргэттэригэр үллэриини тэрийбитэ. Ону сэргэ балыктаан, ону ыыһаан антах арҕаа сылдьар уолаттарбытыгар ыытыыны тэрийэр. Онон биһиги бары олус астынабыт, киэн туттабыт. Маннык үтүө дьыаланан дьарыктаналларыгар махтанабыт. Өрөспүүбүлүкэ салалтата, кыахтаах спонсорствоны оҥороллоругар баҕарабыт.
Сыл ахсын Өлүөнэ Эбэбитигэр, Өлүөнэ очуостарыгар тиийэ «Кочевник» диэн катамараанынан сынньалаҥы тэрийэллэр. Онно катамаран мотуора эргэрбитэ бу дьоһуннаах үлэни атахтыыр эбит, саҥа мотуор наада эбит. Кырдьаҕастар, байыаннай дьайыы кыттыылаахтарын дьиэ кэргэттэрэ көмөлөһө сатыыбыт. Өрөспүүбүлүкэ салалтата эмиэ көмөнү оҥороругар көрдөһөбүт.

Василий ГОГОЛЕВ-УЙУЛҔАН, суруйааччы