Баҕардахха дохуот да, ситиһии да кэлэр

ЧУРАПЧЫГА – МАССЫЫНА СЕРВИҺЭ

Саха сирин хас биирдии улууһугар социальнай хантараагынан өйөбүлү ылбыт дьиэ кэргэттэр бааллар. Элбэх оҕолоох аҕа, урбаанньыт Станислав Барашков толору сэбилэммит массыына сервиһин арыйар баҕа санаатын толорон, социальнай хантараак түһэрсибитэ.

Онон 30 саастаах Станислав Владимирович ааспыт сыл сэтинньитигэр “Аартык” массыына сервиһин арыммыта. Кини бу иннинэ массыынаны өрөмүөннээһиҥҥэ үлэлээбит буолан, ымпыгын-чымпыгын билэр этэ. Баҕа санаатын толорор туһугар бастаан Чурапчы — Дьокуускай хайысханан таксыыстаабыта. Онтон “Хайс” микро-оптуобуһу атыылаһан Владивостокка тиийэ дьону уонна таһаҕаһы таһар буолбута. Бу сылдьарын тухары сервис арыйар туһунан саныыр, толкуйдуур этэ.

Олох оргуйар үөһүгэр сылдьар Станислав Барашков дьиэ кэргэнин хааччыйарын сэргэ, улуус олоҕор көхтөөхтүк кыттар.

“Үлэһит киһиэхэ суола арыллан иһэр” диэн мээнэҕэ эппэттэр. Станислав былырыын Чурапчы улууһун баһылыгын Гранын сүүмэрдиир куонкуруһугар кыайан, 120 тыһыынча солкуобай суумалаах эбии өйөбүлү ылбыта.

Үлэтин-хамнаһын өссө кэҥэтэр туһуттан 2025 сыллаахха саҥа социальнай хантараагы түһэрсибитэ уонна 500 тыһыынча суумалаах судаарыстыба көмөтүнэн туһаммыта. Бу харчытынан аныгы тэриллэри атыыласпыта. Онон оҥорор өҥөтүн арааһын элбэппитэ уонна хаачыстыбатын өссө тупсарбыта.

Олох оргуйар үөһүгэр сылдьар Станислав Барашков дьиэ кэргэнин хааччыйарын сэргэ, улуус олоҕор көхтөөхтүк кыттар. Ол курдук, улууска ыытыллар тэрээһиннэргэ успуонсардыыр, “Дари-Добро” уонна “Үтүө санаа харыйата” аахсыйалар чэрчилэринэн элбэх оҕолоох уонна кыаммат-түгэммэт ыалларга көмөлөһөр. Байыаннай дьайыы кыттыылаахтарын уонна кинилэр дьиэ кэргэттэрин эмиэ өйүүр, көмөлөһөр.

“Аартык” массыына сервиһэ быйыл саас “Саха сирин бастыҥ табаардара” куонкурус муниципальнай түһүмэҕин ааспыта уонна бочуоттаах номинациянан бэлиэтэммитэ.

САНАА

Станислав Барашков, урбаанньыт:

— 2018 сыллаахха социальнай хантараагы түһэрсэргэ докумуоннарбын аан бастаан биэрбитим, дьиэлэри пенополиуретановай сылытыыга биисинэс-былаан оҥорбутум. Ол гынан баран, хантараак түһэрсэртэн аккаастаабыттара. Санаабын түһэрбэтэҕим. Бэйэм алҕастарбын билинэн уонна уопутура түһэн баран 2023 сыллаахха эмиэ сайаапка түһэрбитим уонна 350 тыһыынча солкуобай кээмэйдээх көмө ылбытым. Бу харчыбынан икки 2 подъемник, компрессор, сууйар тэрили (мойка) ылан, Владивостоктан тиэйэн аҕалбытым. Ыыта сылдьыбыт массыынабын атыылаан, сервиһим дьиэтин тутарбар сэндвич-панеллары атыыласпытым.

ХААРТЫСКАЛАР ДЬОРУОЙ ТУС АРХЫЫБЫТТАН