Баһаардар тохтооботтор: биир суукка түмүгэ

Кэнники кэмҥэ күн аайы кэриэтэ баһаардар тахсар буоллулар. Киһи өлүүлээх баһаардар тахсаллара олус хомолтолоох. Онон автономнай иһитиннэрэр тэриллэри (АДПИ) хас биирдии дьиэҕэ туруорар ирдэниэн наада курдук. Ааспыт сууккаҕа өрөспүүбүлүкэҕэ  түөрт техногеннай баһаар тахсыбын туһунан СӨ Судаарыстыбаннай баһаарынай сулууспа таһаарда. Бу барыта бэҕэһээ эрэ тахсыбыт баһаардар.

Олунньу 11 күнүгэр 02:45 чааска баһаарынай чааһыгар Дьааҥы улууһун Улахан Күөл сэлиэнньэтигэр 4 кыбартыыралаах, аҥара көһөрүллүбүт дьиэҕэ баһаар тахсыбытын туһунан иһитиннэрии киирбит. Уот 70 кв.м. иэннээх 2-с №-дээх кыбартыыраны уонна 150 кв.м. иэннээх дьиэ үрдүн бүтүннүү сиэбит. Баһаар төрүөтэ, буруйдаах киһи уонна хоромньу суумата быһаарылла сылдьар. Баһаары умуруорарга 2 автоцистиэринэ уонна 7 киһи кыттыбыт. Ону тэҥэ атын сулууспаттан 3 киһи уонна 1 тиэхиньикэ көмөлөспүт.

13:32 чааска баһаарынай чааска Бүлүү оройуонун Кыһыл Сыыр бөһүөлэгэр УАЗ микрооптуобус массыына умайбытын туһунан иһитиннэрии киирбит. Уот 8 кв.м. иэннээх УАЗ микрооптуобус массыынаны бүтүннүү сиэбит. Баһаар тахсыбыт биричиинэтэ, буруйдаах киһи уонна хоромньу суумата быһаарыллар.

15:19 чааска Уус Алдан оройуонун Уһун Күөл сэлиэнньэтигэр чааһынай харааска баһаар тахсыбытын туһунан иһитиннэрии киирбит. Уот 36 кв.м. иэннээх харааһы бүтүннүү сиэбит. Баһаар төрүөтэ, буруйдаах киһи уонна хоромньу суумата быһаарыллар. Баһаары умуруорууга 5 киһи, анал тиэхиньикэ ону таһынан ДПК 5 киһитэ кыттыбыт. Баһаар тахсыбыт сириттэн чугас турар ыал дьиэтэ быыһаммыт.

16:22 чааска Мииринэй оройуонун Айхал бөһүөлэгэр чааһынай маҕаһыын умайан эрэрин туһунан иһитиннэрии киирбит. Уот 60 кв.м. иэннээх маҕаһыыны бүтүннүү сиэбит. Баһаар төрүөтэ, буруйдаах киһи уонна хоромньу суумата быһаарыллар. Баһаары умуруорууга икки цистиэринэ уонна 8 киһи кыттыбыт. Ону таһынан атын сулууспалартан 7 киһи уонна 3 тиэхиньикэ үлэлээбит.