Баһаарга үс оҕо өлүүтүгэр бириигэбэр таһаарылынна

Дьокуускай куорат суута сэрэҕэ суохтан икки уонна онтон элбэх киһини  өлүүгэ тириэрдии холуобунай дьыалатын көрдө.

Суут быһаарбытынан, 2024 сыл балаҕан ыйын 20 күнүгэр Абый улууһун 25 саастаах олохтооҕо маҕаһыыҥҥа атыылаһа барбыт. Ол барарыгар Сэбиэскэй аармыйа 50 сыла уулуссаҕа баар дьиэтигэр 2021, 2022 уонна  2024 сыллаах төрүөх оҕолорун бэйэлэрин соҕотохтуу хаалларбыт, зажигалкатын оҕолор көрөр сирдэригэр  ууран барбыт.

Ону 3 саастаах уола саалаҕа умаппытын түмүгэр баһаар тахсан,  үс оҕо суорума суолламмыт. Холуобунай дьыала ураты бэрээдэгинэн көрүлүннэ.

Суут накаастабылы аныырыгар дьахтар туһунан үчүгэй характеристиканы, сууттана сылдьыбатаҕын, буруйун билиниитин,  кыра саастаах оҕолооҕун учуоттаата. Кини 1 сыл 6 ыйга көҥүлэ быһылынна.

СӨ сууттарын холбоһуктаах пресс-сулууспата