Баһаартан дьону быыһаабыт полиция үлэһитэ наҕараадаланна

Миниистир Владимир Колокольцев  ИДьМ  СӨ Уус Маайатааҕы отделын  полициятын үлэһитин, прапорщик Айдар Борисовы “За смелость во имя спасения” диэн  биэдэмистибэннэй мэтээлинэн наҕараадалаата. Бу туһунан ИДьМ бэрэстэбиитэлэ Ирина Волк телеграм ханаалыгар суруйда.

Айдар Борисов умайа турар дьиэттэн  икки киһини быыһаабыт.

Ол курдук, Борисовка биир долгуйбут дьахтар  сүүрэн кэлэн,  Пушкин аатынан  уулуссаҕа баар  түөрт кыбартыыралаах мас дьиэттэн буруо тахсарын туһунан тыллаабыт. Полиция үлэһитэ тута дьуһуурунайга  биллэрбит уонна ыйыллыбыт аадырыска барбыт.

Быһылаан буолбут сиригэр тиийэн, Айдар Борисов  биир кыбартыыраҕа икки киһи баарын туһунан олохтоох киһиттэн билбит.  Кыбартыыраҕа киирэн  дьахтардаах эр киһини быыһаабыт.