Бахсы Уус быыстапката аһылынна
09.02.2026, 16:00
Хаартыска: Хомус түмэлэ уонна киинэ.
Бөлөххө киир:
Олунньу 6 күнүгэр Хомус аан дойдутааҕы киинигэр учуонай, уус Николай Бурцев-Бахсы Уус 75 сааһыгар анаммыт быыстапка аһыллыыта буолан ааста.
Кини айар үлэтин сэргиир киһи элбэх. Онон Хомус киинигэр лыык курдук элбэх киһи муһунна. М.Жирков аатынан муусука колледжын устудьуоннара кэрэ-нарын дорҕооннору намылытан, бу түгэни ордук киэргэттилэр.
Бахсы Ууһу култуура миниистирин бастакы солбуйааччы Мария Турантаева, Хомус түмэлин уонна киинин дириэктэрэ Дмитрий Бястинов, Хомус түмэлин уонна аан дойду норуоттарын хомустарын киинин бэрэсидьиэнэ Иван Алексеев-Хомус Уйбаан эҕэрдэлээтилэр.
Мария Турантаева Бахсы Уус олоҕун устата төрүт үгэстэри сөргүтүүгэ, норуот айымньытын, култуураны сайыннарыыга киллэрбит кылаатын үрдүктүк сыаналаан туран, «Култуура туйгуна» бэлиэни туттарда. Дмитрий Бястинов Бахсы Уус хомустара уратыларын бэлиэтээтэ, Култуура сылыгар Хомус киинин бастакы тэрээһининэн эҕэрдэлээтэ.
Салгыы Николай Бурцев-Бахсы Уус бэйэтинэн быыстапкаҕа экскурсиялатта. Кини өр сыллаах чинчийиилэрин, булумньуларын, үлэлэрин туһунан кэпсээтэ. Бу кэмҥэ импровизатор-хомусчут Алена Платонова Бахсы Уус хомустарын тыаһатан, иһитиннэрдэ.
Быыстапкаҕа Уус Алдан улууһун баһылыга Василий Алексеев, виртуоз хомусчут Спиридон Шишигин, Арассыыйа Уустарын сойууһун чилиэнэ Николай Потапов, Арассыыйа норуодунай маастара Роман Готовцев, Саха сирин норуодунай маастара Иван Павлов-Утум Уус, уо.д.а. бары кэлэн, Николай Николаевиһы олоҕун биир кэрдиис кэминэн эҕэрдэлээтилэр, өссө да өр сыллаах олоҕу, айымньылаах үлэни баҕардылар.
Николай Бурцев хаһыс да көлүөнэ удьуор уус буолар. Кини 1967 сылтан аҕатын кытта хомустары оҥорон саҕалаабыттара. Ол саҕана микрофон суох буолан, хомус тыаһын улаатыннараары, улахан хомустары оҥорбуттара. Ол эрээри, ол хомустар тыастара соччото суох, оонньуурга да табыгаһа суох этэ. Онуоха аҕата өр толкуйдаан, уопут бөҕө оҥорон, үчүгэй, улахан тыастаах хомустары айан таһаарбыта. Хомуһу үс сиринэн иҥиннэрэн, быһыытын-таһаатын чочуйан таһаарбыта.
Бу кэмтэн ыла Бахсы Уус айымньылаахтык үлэлээн, сүүһүнэн хомуһу оҥорон, тарҕаттаҕа.
Сообщить об опечатке
Текст, который будет отправлен нашим редакторам: