Баһылай айар кэнсиэрэ

Майатааҕы оҕо мусукаальнай оскуолаҕа 41 сыл үлэлээбит, билигин 35 сылын дириэктэрдии сылдьар Баһылай Дьөгүөрэбис Сахаарап 65 сааһын көрсө «Үлэлээбит суолум» диэн айар кэнсиэрин көрөммүт  көрөөччүлэр бары да дьоллонон ыллыбыт.

Икки аҥаар чаас  оркестр доҕуһуолунан барбыт кэнсиэр олус табыллыбыт. Сөҕүмэр үлэ, репетиция, түмсүү барбытын сэрэйэҕин эрэ. Бу биир кэнсиэри ыытаары буолбатах оркестр элбэх сыл үлэлээн, араас кэнсиэрдэри доҕуһуоллаан мунньуммут уопутун толору бу киэһээ көрдөрдө. Биһиги мэҥэлэр Баһылай баарыттан дьоллоохпут, үөрүүбүт-көтүүбүт үрдүк эбит.

Кэнсиэр темата, муусуката олус киэҥ: аан дойду классическэй муусукатыттан саҕалаан, сэбиэскэй киинэ муусукатын, Арассыыйа аатырар-сураҕырар ырыаларын, Сахабыт сирин муусукатын ырыатын барытын иһитиннэрдэ, көрдөрдө. Онон алта уон биэспитин ааспыт дьон эдэр сааспыт киинэлэрин муусукатын, Кремлевскай дыбарыаска улахан бырааһынньыктарга телевизорга  көрөн истибит муусукаларбытын, ырыаларбытын Ходулов аатынан театрбыт сценатыгар тыыннаахтыы оркестр, муусукааннар биирдиилээн толорууларыгар иһиттибит.

«Три товарища» киинэ бүтэһигэр сындалҕаннаах, элбэҕи санатар, киһи хараҕын уутун тоҕор муусука дорҕоонун Денис Григорьев трубаҕа толорон ааспыты эргиттэ. Киһи сүрэҕин көрбүтүнэн киирэр дорҕооннор. Кулгаахпар билигин да иһиллэр. Ааспат эбит.

Надежда Захарова «Гляжу озера синие» нуучча аатырбыт ырыаһыттарыттан хаалсыбакка тоҕо-хоро  оркестр доҕуһуолугар ыллаабыта олус астыннарда. Ханан эрэ балалайка дорҕооно улаханнык биллэн ааһар, сэбирдэх тыалга хамсыырыныы тэлибириир, ханан эрэ баян тыаһа киирэн тахсар, биир күрүс оркестр доҕуһуоллуур, бас гитара кэннилэриттэн күөйэр хаайар. Олус да бу ырыа муусуката табыллыбыт эбит. Били Хара оскуолатыгар үөрэнэ баран иһэр кыра кырасаабысса кыыспыт, Арассыыйа хотун хаан ырыаһытыгар кубулуйбут.

Владимир Индигирскэй Баһылайдыын музыкальнай училищеҕа бииргэ үөрэммит эбит. 1983 сыллаахха бүтэрэн Павловскайбытыгар кулуупка үлэлии сылдьыбыт. Икки ырыаны бэлэхтээтэ. Куруук ыллыыр «Сулустарын» соһо сылдьар эбит. Бу сырыыга көрөөччүлэр «50+» судьуйатын курдук сыаналаатыбыт. Арааһа салгыы ыытыа суох эбиппит.Дорҕооно сүтүтэлии сырытта.

Флейтэҕэ  Саяна Иванова олус да бэркэ оонньоото.

Скрипачка кыыс  Галина Христофорова кэнсиэри киэргэттэ. Былыргыны санаттылар.

Мэҥэ бүгүҥҥү күөрэгэйэ Павел Егоров Табаҕаттан кэлэн ырыа ыллаан сэргэхситтэ.

Баянистар «Якутские наигриши» тыаһатан, көтүтэн илдьэ бардылар. Виталий Очиров оркестр доҕуһуолунан» Уот Дьулустаан» киносериалга толорбут ырыатын иһитиннэрдэ.

Зоя Чупрова балайкаҕа «Старое Банжо» муусукатын толордо. Уопсайынан оркестрга балалайка, домбраҕа араастара оонньоон сүрүн баартыйалары толороллор эбит. «Төрүт ийэлэрэ» Майа мусукаалынай оскуолатыгар балалайка, домбра кылааһын 47 сыл үөрэппит Дария Васильевна  Винокурова 70 сааһын балайда аастар оркестрга оонньуу олордо. Зоя кини үөрэнээччитэ этэ. Кылааска дьарыктыы олордоҕуна хаста да киирэн истибитим. Оччоттон бэркэ оонньуура. Уһук Илиҥҥэ балалайкаҕа бастаан турар. Билигин Зоя бэйэтэ уопуттаах преподаватель. Үөрэтэр оҕолорунаан кэккэлэһэ олорон  оркестрга оонньоотулар. Домбралар эмиэ элбэхтэр. Кырдьаҕас учууталларын Дария Васильевна тула чөмөхтөһөн олорон бэртээхэйдик да оонньоотулар. Преподавателлэр, үөрэнээччилэр.

Мин көрдөхпүнэ үс көлүөнэ мусукааннар оркестрга бааллар.

Баһылай үлэтэ тахсыылаах буоларыгар, кинини кытта өр кэм бииргэ үлэлээбит  Дария Васильевна, Светлана Петровна Маркова, флейтаҕа  оонньуур Антон Борисов , Альфия, Дмитрий Санников уо.д.а. бииргэ үлэлээннэр оскуолалара Саха Сиригэр, Арассыйаҕа да иһиллэр биллэр буоллаҕа.

Кэлин кэлэн бэркэ үлэлиир Ванда Нестерова (струнно-смычковай отделение), Данил Алексеев  (баян), Денис Григорьев (труба) уо. д. а. оркестр   сайдарыгар көмөлөспүттэр.

Вокальнай отделение ырыаһыттары таһаара турар эбит.Кырачаан Яна Бурнашева, Лилия Нестерова куоластара турбут, артикуляцияны сатаан туттар буолбуттар.

Татьяна Степанова, Надежда Захарова эмиэ вокал кылааһын оҕолоро этэ.

Матрена Сыромятникова «Эхо любви» ырыаны ситиһиилээхтик толордо. Көрөөччүлэр олус биһирээбиттэр.

Баһылай! Үлэлээбитиҥ курдук үлэлии, улууспут мусукаалынай сайдыытын өрө таһаарбытыҥ курдук таһаара тур! Талааннаах преподавателлэри олохсуппутун курдук олохсута тур! Дьиэн — уотун толору ситтэ. Аны аралдьыйбакка муусуканы эрэ мускуйарын хаалла.

Доруобай буол! Дьиэ кэргэҥҥэр дьол тосхойдун. Туску!

Муусукаҕа сүгүрүйээччи Федот Харитонов