Баһылык дьиэ кэргэн пиэрмэтин үлэтин билистэ

Бүгүн, ыам ыйын 27 күнүгэр, Мэҥэ Хаҥалас улууһун баһылыга Дмитрий Тихонов Дьабыыл нэһилиэгэр Лариса  уонна Егор  Ивановтарга ыалдьыттаата. 

Дьиэ кэргэн 2023 сылга нэһилиэктэр ортолоругар тыа хаһаайыстыбатын сайыннарыыга туһуламмыт Баһылык гранын куонкуруһугар кыайыылаах тахсан көтөрү иитэр пиэрмэни үлэҕэ киллэрбиттэр. Дьиэ кэргэн үлэтин-хамнаһын туһунан Дмитрий Тихонов бэйэтин телеграм-ханаалыгар сырдатта:

«Бүгүҥҥү күҥҥэ пиэрмэ кэҥээн, уопсайа үс тыһыынча төбө көтөр иитиллэр кыахтанна. Туруу үлэһит дьоммут күннэтэ үлэ-хамнас тигинэччи бара турарын, нэһилиэнньэ бородууксуйаны эрдэттэн сакаастаан, хамаҕатык атыылаһалларын, көһүтэ күүтэллэрин астына бэлиэтииллэр. Уйбануоптар былырыыҥҥы сылга сэттэ туонна көтөр этин оҥорон таһааран атыылаабыттара. Үс киһи үлэ миэстэтинэн хааччыллан хамнас аахсар, дьоммут-сэргэбит ыраас, бэйэ бородууксуйатынан хааччыллар кыахтанна. Дьиэ кэргэнинэн бурдук ыһан, кууруссаларын бэйэ бурдугунан аһаталлара, төлөһүтэллэрэ ордук кэрэхсэнэр.

Маннык үлэһит дьоммут баарын тухары тыа сирэ кэскиллээх, саха омук сарсыҥҥылаах, биһиги саҥа сүүрээннэри, ыччаттарбытын, олохтоох оҥорон таһаарыыга туһуламмыт бырайыактарын олоххо киллэрэллэригэр куруук өйүөхпүт. Күннэтэ тыабыт хаһаайыстыбатын сайыннарыыга үлэлэһэ сылдьар үлэһит дьоммор салгыы таһаарыылаах үлэни, чэгиэн-чэбдик туругу, бары үтүөнү баҕарабын».

Сиһилии @dmitriytikhon0v сигэнэн киирэн билсиҥ.