Баһылык ойоҕун кытта дуогабар түһэрсэн, дуоһунаһыттан босхоломмут

Кэбээйи улууһун борокуратуурата хоруупсуйа быраабын кэһии түмүгэр олохтоох бүддьүөккэ 160 тыһыынчаттан тахса солкуобайы төлөттө.  Бэрэбиэркэ түмүгүнэн, Кэбээйи нэһилиэгин баһылыга, бэйэтин урбаанньыт кэргэнин кытта, гараас куортамын уонна тутуу матырыйаалларынан хааччыйыы туһунан дуогабардары, уопсайа 160 тыһыынчаттан тахса солкуобайга түһэрсибитэ быһаарылынна.

Бу туһунан СӨ Борокуратууратын пресс-сулууспата иһитиннэрэр.

Дьиэ кэргэн дуогабара хоруупсуйаны утары сокуону кэһэн оҥоһуллубуттар, тоҕо диэтэххэ, салайааччы тус интэриэһинэн салайтарбыт. Борокуратуура ирдэбилинэн суут баһылык, болдьоҕун иннинэ итэҕэли сүтэрбитинэн, боломуочуйатын тохтоппут. Ону таһынан, Саха сирин Арбитражнай суута борокуратуура ирдэбилин толору бигэргэтэн, сокуоннайа суох ылыллыбыт харчыны нэһилиэк баһылыгын ойоҕуттан, урбаанньыттан дьаһалта туһатыгар төнүннэриллибит.

Билиҥҥи туругунан дьыала түмүктэммит – дьаһалтаттан ылыллыбыт үп бүддьүөккэ төнүннэриллибит.