«Байааным алыптаах ырыата» өрөспүүбүлүкэтээҕи ырыа күрэҕэ

    Чурапчы улууһун Хоптоҕо нэһилиэгэр муус устар 4 күнүгэр СӨ култууратын туйгуна, А.В. Посельская аатынан Дириҥнээҕи оҕо ускуустубатын оскуолатын байаан кылааһын учуутала, Дириҥнээҕи норуодунай хор аккомпаниатора Прокопий Иванович Тарабукин сырдык аатыгар «Байааным алыптаах ырыата» өрөспүүбүлүкэтээҕи ырыа күрэҕэ буолан ааста.

Бу улахан куонкуруһу Дириҥнээҕи норуодунай хор (сал. Ф.И.Попова), Дириҥнээҕи оҕо ускуустубатын оскуолатын кэлэктиибэ  (сал. А.П. Новгородов), Прокопий өр сылларга бииргэ үлэлээбит кэллиэгэлэрэ уонна дьиэ кэргэнэ, бииргэ төрөөбүттэрэ  көҕүлээн-тэрийэн ыыттылар.

Прокопий Иванович Дириҥнээҕи норуодунай хорга өр сылларга ситиһиилээхтик үлэлээбитэ. Салайааччы СӨ култууратын үтүөлээх үлэһитэ Фекла Ивановна сүбэтинэн, такайыытынан айымньылаахтык үлэлээн, улууска, өрөспүүбүлүкэҕэ биллэр улахан баянист буола сайдыбыта. Кини байааҥҥа доҕуһуолунан  норуодунай хор өрөспүүбүлүкэ араас муннуктарыгар элбэх куонкурустарга кыайыы өрөгөйүн билбитэ, нэһилиэк, улуус култуурунай олоҕор инники күөҥҥэ сылдьыбыта.

Күрэххэ Амматтан, Тааттаттан, Мэҥэ Хаҥаластан, Чурапчыттан, Сунтаартан, Дьокуускай куораттан барыта 26 кыттаачы кытынна. Куонкуруһу  сааһынан 2 бөлөххө арааран сыаналаатылар, иһиттилэр. Дьүүллүүр сүбэҕэ Попов Д.Д. – Чурапчы улууһун Култуураҕа управлениетын Олоҥхо киинин салайааччыта, Васильева А.В. – Дириҥнээҕи оҕо ускуустубатыын оскуолатын вокал кылааһын салайааччыта, Черноградская А.А. – М.Н.Жирков аатынан музыкальнай колледж ырыа салаатын выпускницата, Муусука үрдүкү оскуолатын 2 кууруһун устудьуона, Васильев Дь.В. — М.Н.Жирков аатынан музыкальнай колледж байаан салаатын выпускнига, АГИКИ устудьуона, Прокопий Иванович үөрэнээччитэ — үлэлээтилэр, түмүгү таһаардылар.

Ырыаһыттары сааһынан 2 бөлөххө арааран сыаналаатылар, иһиттилэр. Ол курдук анал ааттары ыллылар: Анна Иванова, Елена Сивцева, Айталина Сивцева, Роман Романов, Валерий Слепцов, Наталья Захарова, Михаил Санников.  18-45 саастаахтарга 3 истиэпэннээх дипломанынан Радислав Атласов (Чурапчы, Дириҥ), 2 истиэпэннээх дипломанынан Елена Тотонова (Чурапчы, Чыаппара), 1 истиэпэннээх дипломанынан Любовь Пинигина (Чурапчы, Дириҥ), 3 истиэпэннээх лауреатынан Марфа Пахомова (Чурапчы), 2 истиэпэннээх лауреатынан Дьулустаан Михайлов (Мэҥэ Хаҥалас, Тиэлиги), 1 истиэпэннээх лауреатынан Анатолий Гуляев (Орто Халыма) буоллулар. 45 саастарыттан үөһэ ырыаһыттарга 3 истиэпэннээх дипломанынан Александра Андреева (Амма), 2 истиэпэннээх дипломанынан Спиридон Григорьев (Мэҥэ Хаҥалас, Хара), 1 истиэпэннээх дипломанынан Аскалон Егоров (Нам), 3 истиэпэннээх лауреатынан Анастасия Шоломова (Чурапчы, Бахсы), 2 истиэпэннэх лауреатынан Владимир Николаев  (Чурапчы, Мугудай), 1 истиэпэннээх лауреатынан Иван Егоров ( Чурапчы, Одьулуун) таҕыстылар. Гран При үрдүк аатын Сунтаар улууһуттан сылдьар Иван Аммосов ылла. Кыайыылаахха харчынан анал бирииһи Прокопий оскуолаҕа бииргэ үөрэммит доҕотторо туттардылар. Киниэхэ байааҥҥа доҕуһуоллаата Александр Харитонов.

Маны таһынан Прокопий Иванович ийэтэ Мария Лукинична, бииргэ төрөөбүттэрэ, кэргэнэ Матрена Эдуардовна, оҕолоро анал бириистэри анаатылар.  Ол курдук байааҥҥа бастыҥ доҕуһуолун иһин  Леонид Винокуровка ( Мэҥэ Хаҥалас) уонна  үөрэтэн-уһуйан таһаарбыт үөрэнээччитигэр Дьулус Васильевка “Утум салҕааччы” анал ааты туттардылар.

Көрөөччүлэр хас биирдии ырыаһыты, байаан иэйиилээх муусукатын олус истиҥник көрүстүлэр, ытыс дохсун тыаһын бэлэхтээтилэр. Бу ураты күн олус иһирэхтик ааспытын мустубут дьон бэлиэтээтилэр.

Дьоҥҥо куруук сырдыгы, кэрэни саҕа сылдьыбыт Прокопий Иванович сырдык аата өрүү ааттана турдун, байаан алыптаах муусуката хаһан да уҕараабатын.

Марфа Далбаева, Дириҥ орто оскуолатын учуутала.