Байыаннай дьайыы 4 кыттыылааҕар массыына күлүүстэрин туттардылар

Байыаннай дьайыы түөрт бэтэрээнигэр  илиинэн салайар анал массыыналар күлүүстэрин туттардылар. Күлүүһү туттарыы сиэрэ-туома  “Аҕа дойдуну көмүскээччилэр” байыаннай дьайыы кыттыылаахтарын өйүүр судаарыстыбаннай пуонда филиалыгар буолла.

Калининградтааҕы “Автотор” собуотун илиинэн салайар SWM массыына мааркатын хаһаайыннарынан инбэлиит бэтэрээннэр Алексей Карпухин, Фёдор Максимов, Сергей Монахов, Дмитрий Федотов буоллулар.

Күлүүстэри Бырабыыталыстыба Бэрэссэдээтэлин солбуйааччы Георгий Степанов туттарда.

“Бүгүн биһиги “Аҕа дойдуну көмүскээччилэр” судаарыстыбаннай пуонда филиалыгар өрөспүүбүлүкэҕэ аан бастаан байыаннай дьайыы түөрт бэтэрээнигэр маннык массыыналары туттардыбыт.

Өрөспүүбүлүкэ Ил Дарханын Айсен Николаев ыйааҕынан байыаннай дьайыы бэтэрээннэригэр анал суоппар дастабырыанньаларын ылыыга үөрэх сыанатын толуйууга биһиэхэ өйөбүл миэрэтэ көрүллүбүтүн санатабын. Онон бүгүн маннык дастабырыанньалаах түөрт бастакы дьоруойбутугар Калининградка оҥоһуллубут саҥа массыыналар күлүүстэрин туттардыбыт.

Бу кроссовердар илиинэн анал салайардаахтар. Бу саҥа тырааныспардар кинилэргэ эйэлээх олоххо сылдьалларыгар, харгыстары туоруулларыгар көмөлөһүөхтэрэ.

Өрөспүүбүлүкэҕэ биһиги бэтэрээннэрбит кыһамньыны уонна өйөбүлү билэллэрин курдук дьаһаныахтаахпыт. “Аҕа дойдуну көмүскээччилэр” судаарыстыбаннай пуонда олоххо киллэрэр бырагыраамата салҕаныа диэн эрэнэбит”, — диэтэ Георгий Степанов.

Саҥа массыынаны ылбыттар ааттарыттан «Хорсун быһыы» уордьан кавалера Алексей Карпухин тыл эттэ.

«Аҕа дойдуну көмүскээччилэр” пуондаҕа махтанабын. Тырааныспар бу көрүҥэ сылдьарбытыгар көмөлөһүөҕэ. Биһиги судаарыстыбабыт өйөбүлүн биллибит. Бааһырыахпытыттан саҕалаан бу күҥҥэ диэри тустаах пуонда, өрөспүүбүлүкэ Бырабыыталыстыбата, Арассыыйа Федерациятын Бырабыыталыстыбата көмөлөһөллөр”, — диэтэ Алексей Карпухин.

«Аҕа дойдуну көмүскээччилэр” судаарыстыбаннай пуонда Саха сиринээҕи филиалын салайааччыта Алексей Александров күлүүһү туттарыы үөрүүлээх чааһыгар судаарыстыбаннай пуонда бэрэссэдээтэлэ, Оборуона миниистирин солбуйааччы Анна Цивилева аатыттан бэтэрээннэргэ эҕэрдэни тириэртэ.

«Дойду үрдүнэн бүттүүнүгэр, ол иһигэр Саха сиригэр Аҕа дойдуну көмүскээччилэри өйүүргэ улахан үлэ барар. Филиал кэлэктиибин аатыттан эһиги хорсун быһыыгыт иһин махтанабын”, — диэтэ Алексей Александров.

Үөрүүлээх тэрээһиҥҥэ өрөспүүбүлүкэ Эргиэн-бырамыысыланнай балаататын салайааччыта Марина Богословская уонна “Щит и меч” тэрилтэ дириэктэрэ Георгий Глебов кытыннылар.

Санаттахха, 2024 с. тустаах пуонда байыаннай дьайыы бэтэрээннэрин илиинэн салаллар массыыналарынан хааччыйарга этии киллэрбитэ. Ону Судаарыстыбанннй Дуума уонна РФ Бэрэсидьиэнэ өйөөбүттэрэ. 2024 сыл ыам ыйын 29 күнүгэр Арассыыйа Бэрэсидьиэнэ Владимир Путин ыараханнык эчэйбит байыастарга сылдьалларыгар анал сириэстибэлэри биэрэргэ федеральнай сокуоҥҥа илии баттаабыта.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата