Байыаннай дьайыы 880-тан тахса кыттыылааҕа үлэҕэ ылылынна

Саха сиригэр Нэһилиэнньэ дьарыктаах буолуутугар судаарыстыбаннай кэмитиэт  үлэтин чэрчитинэн,  байыаннай дьайыы 880-тан тахса кыттыылааҕа уонна дьиэ кэргэнин чилиэннэрэ үлэҕэ ылыллыбыттарын туһунан олунньу 11 күнүгэр биэдэмистибэ бэрэссэдээтэлэ Светлана Горюшинская брифиҥҥэ иһитиннэрдэ.

«Өрөспүүбүлүкэҕэ  байыаннай дьайыы кыттыылаахтарын уонна кинилэр дьиэ кэргэттэрин чилиэннэрин үлэҕэ ыларга улахан үлэ  ыытыллар. Бу сыл тохсунньу уонна олунньу саҥатыгар байыаннай дьайыыттан кэлбит 8 киһи үлэ булла”, —  диэтэ Светлана Горюшинская.    

Санатан эттэххэ, Ил Дархан Айсен Николаев СӨ Судаарыстыбаннай мунньаҕар (Ил Түмэҥҥэ) Анал этиитигэр  байыаннай дьайыы кыттыылаахтара эйэлээх олоххо төннөллөрүгэр социальнай адаптацияны ааһыыларын   биир сүрүн соругунан ааттаабыта.

«Биһиги байыастарбыт төрөөбүт дойдуларыгар кыайыылаах кэлиэхтэрэ. Былаас уонна уопсастыба икки ардыгар улахан сорук турар — биһиги кинилэр эйэлээх олоххо төннөллөрүгэр көмөлөһөргө бэлэм буолуохтаахпыт. Хас биирдии буойун доруобуйатын толору чөлүгэр түһэриитин хааччыйыахтаахпыт.  Сөптөөх хамнастаах үлэҕэ сирдээн, үлэлээх буолуу боппуруоһун быһаарыахтаахпыт, наадалаах идэни ыларыгар кыаҕы биэриэхтээхпит. Мин байыаннай сулууспалаахтар  бары хайысхаҕа социальнай адаптацияны ааһалларыгар үлэни күүһүрдэргэ өрөспүүбүлүкэ бырабыыталыстыбатыгар, муниципальнай тэриллиилэр баһылыктарыгар сорудахтыыбын”, — диэбитэ өрөспүүбүлүкэ баһылыга.

Ил Дархан сорудаҕынан “Дьоруойдар бириэмэлэрэ” диэн федеральнай бырагыраамаҕа майгынныыр “Саха сирэ – дьоруойдар сирдэрэ” диэн каадыр бырагыраамата саҕаланар. Бырайыак сыала-соруга – судаарыстыбаннай салайыы саҥа култууратын оҥоруу.