Байыаннай дьайыы байыастара “СВОе дело” саҕалыахтарын сөп

Ыам ыйын 19 күнүттэн Саха сиригэр “СВОе дело” үөрэх бырайыага саҕаланыаҕа диэн “Мин бизнеһим” Киин иһитиннэрэр.

Бырагыраамаҕа байыаннай дьайыыттан демобилизацияламмыт кыттааччылар, бэтэрээннэр, онно сылдьан инбэлиит буолбут дьон уонна кинилэр дьиэ кэргэттэрин чилиэннэрэ, ол иһигэр 14 саастарын туолбут оҕолор кыттыахтарын сөп, диэн Киин исписэлиистэрэ эттилэр.

“Биһиги Кииммит саҥа үөрэтэр бырайыага байыаннай дьайыы кыттыылаахтарыгар уонна кинилэр дьиэ кэргэттэригэр урбаанныыр кыахтарын арыйалларыгар көмөлөһүөҕэ, ону тэҥэ бизнеһи хайдах саҕалыыры уонна сайыннарары билиэхтэрэ. Урбаан дьыалата байыаннай дьайыы бэтэрээннэрин эйэлээх олоххо киллэрэргэ улахан суолталаах инструменынан буолан эрэр. «СВОе дело» бырайыак бары көҕүлээһиннэрин «Mин бизнеһим» Киин хамаандата арыаллыы сылдьыаҕа, ону тэҥэ уопуттаах үлэлии сылдьар урбаанньыттар настаабынньыктыыр тиһиктэрин киллэрэр былааннаахпыт. Бу дьаһаллар бырайыак идеяларын барытын кэммиэрчэскэй ырыынакка түргэнник уонна ситиһиилээхтик таһаарар кыаҕы биэриэхтэрэ», — диэн бэлиэтээтэ СӨ урбааҥҥа, эргиэҥҥэ уонна туризмҥа миниистирэ Тимур Ханды.

Үөрэтии урбааны, бизнеһи көдьүүстээхтик салайыы төрүттэринэн барыаҕа. Ону уопуттаах бизнес-тириэньэрдэр уонна бизнес-уопсастыба бэрэстэбиитэллэрэ ыытыахтара.

Үөрэтии 5 күн устата барыа, онно бизнес-бырайыактары оҥорон көмүскүөхтэрэ. Бастыҥ бырайыак граҥҥа тиксиэ — бизнескин олоххо киллэр диэн 200 тыһ. солк. туттарыахтара.

Кыттыан баҕалаахтар 2025 сыл ыам ыйын 12 күнүгэр диэри анкетаны толоруохтарын уонна бизнес-идеяларын туһунан бу сигэ  нөҥүө кэпсиэхтэрин наада: https://forms.yandex.ru/cloud/67ee378df47e735985ab964c/

Ыйытыы баар буоллаҕына, бу нүөмэртэн хоруйдуохтара: 8-924-599-01-17, диэн иһитиннэрэр Ил Дархан, бырабыыталыстыба пресс-сулууспата.