Байыаннай дьайыы бэтэрээнэ «Аҕа дойду көмүскээччилэрэ» пуонда филиалын көмөтүнэн реабилитация кууруһун ааста

Саха сириттэн байыаннай эпэрээссийэҕэ кыттыбыт Антон Каменскай Омскайга баар Арассыыйа Социальнай пуондатын «Омский» диэн реабилитациялыыр киинигэр эмтэннэ. Бу сылтан үлэлии сылдьан араас эчэйиилэри ылбыт дьону кытта байыаннай дьайыыга кыттыбыт дьон пуонда кииннэригэр доруобуйаларын тупсарыахтара диэн «Аҕа дойду көмүскээччилэрэ» пуонда Саха сиринээҕи филиала иһитиннэрэр.

Үс нэдиэлэ устата бэтэрээн байыаннай дьайыыга сылдьан ылбыт улахан эчэйиититтэн чөлгө түһэргэ анаан физкултууранан дьарыктанна, массааска, физиотерапевтическай процедураларга сырытта. «Мин бу киин усулуобуйаларын, эмтиир хаачыстыбаларын олус сөбүлээтим. Бииргэ сулууспалаабыт уолаттарбын көрсөн кэпсэтэн, бойобуой доҕотторбутун ахтан-санаан, бэйэ-бэйэбитин өйөһөн үөрдүм», — диир Каменскай.

Эчэйии ылан демобилизацияланан баран, Антон Каменскай пуонда Саха сиринээҕи салаатыгар кэлэ сылдьыбыт. Манна киниэхэ социальнай кураатарынан Полина Дедюкинаны анаабыттара. Бэтэрээҥҥэ туох баар төлөбүрдэри уонна чэпчэтиилэри туһанарга көмөлөспүттэрэ, ол иһигэр инбэлиитинэс биэнсийэтин ыларга, Омскайга эмтэнэ барарга.

«Көмө уонна өйөбүл иһин улахан махталбын тиэрдэбин. Пуондаҕа куруук көмөлөһөллөр. Мин билигин дойдубар Усуйаанаҕа эмтэнэ сылдьабын, ол да буоллар кураатарым куруук сибээскэ баар», — диэн Антон Каменскай кэпсиирин туһунан СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.