Байыаннай дьайыы бэтэрээнэ «Берегиня» киин иитиллээччилэрин кытта патриотическай көрсүһүүнү ыытта

«Аҕа дойдубар сулууспалыыбын» диэн Арассыыйатааҕы сырдатар аахсыйа чэрчитинэн, «Берегиня» киин иитиллээччилэрэ байыаннай дьайыы бэтэрээнэ Алексей Лупеевы кытта көрүстүлэр.

Кини «Аҕа дойдуну көмүскээччилэр» пуонда филиалын социальнай координатора уонна Арассыыйатааҕы «Билии» уопсастыба лектора буолар. Алексей Александрович оҕолору кытта патриотизм, ытык иэс уонна хорсун быһыы туһунан сэһэргэстэ. Кини фроннааҕы олох-дьаһахтан, Арассыыйа байыастарын хорсун быһыыларыттан бэйэтин кэпсээннэрин билиһиннэрдэ уонна иитиллээччилэр үгүс ыйытыыларыгар хоруйдаата.

«Инники кирбиигэ сылдьар уолаттар оҕолортон сурук туттахтарына,  сүрдээх улахан күүһү биэрэрэ. Хас биирдии итинник сурук ханнык да наҕараадаттан күндү этэ, тоҕо диэтэххэ, биһиги бу мичээрдэр тустарыгар, оҕолор кэскиллэрин туһугар манна сылдьарбытын өйдүүрбүт», — диэн Алексей Лупеев бэлиэтээтэ.

«Аҕа дойдуну көмүскээччилэр» судаарыстыбаннай пуонда уонна Арассыыйатааҕы «Билии» уопсастыба тэрийэр «Аҕа дойдубар сулууспалыыбын» диэн Арассыыйатааҕы сырдатар аахсыйа иккис сезона сайыҥҥы чэбдигирдэр хампаанньатын иһинэн, дойду бары эрэгийиэннэригэр ыытыллар. Аахсыйа сыала – байыаннай дьайыы бэтэрээннэрин өйөөһүн уонна кинилэри ыччаты кытта сырдатар үлэҕэ тардыы. Арассыыйа Бэрэсидьиэнэ Владимир Путин Ыйааҕынан тэриллибит «Аҕа дойдуну көмүскээччилэр» пуонда байыаннай дьайыы бэтэрээннэригэр уонна кинилэр дьиэ кэргэттэригэр бары өттүнэн өйөбүлү оҥорор.