Байыаннай дьайыы бэтэрээнэ «Транснефть-Восток» хампаанньаҕа үлэлии киирдэ

«Аҕа дойдуну көмүскээччилэр» пуонда филиала байыаннай дьайыы бэтэрээнэ Юлиан Смогайлов «Транснефть-Восток» бөдөҥ бырамыысыланнай хампаанньаҕа үлэҕэ киирэригэр көмөлөстө.

Юлиан аармыйаҕа 2021 сылга барбыта, 2022 с. олунньуга байыаннай дьайыы сиригэр-уотугар бойобуой сорудахтары толорбута. Ол сыл от ыйыгар демобилизацияланан дьиэтигэр кэлбитэ. Кэлэн баран үөрэҕин салҕаабыта, дойдутугар Өлүөхүмэтээҕи тиэхиньикумҥа үөрэнэн ситиһиилээхтик бүтэрбитэ.

Үөрэҕин бүтэрээт, үлэ көрдөөн барбыта. Онно Юлиан «Аҕа дойдуну көмүскээччилэр» пуонда Саха сиринээҕи филиалыгар тиийбитэ. Социальнай координаторынан Вера Шестакова буолбута.

Манна тутаах хардыынан «Транснефть-Восток» ХЭУо бөдөҥ хампаанньатыгар аадырыстаах көрдөһүү оҥоһуллубута. Социальнай координатор тус бэйэтэ Юлиан резюметын уонна мэктиэ суругу ыыппыта, онно кини үлэлииргэ бэлэмин, бэрээдэктээҕин бэлиэтээбитэ. Кыһамньы түмүктээх буолбута. Юлиан Смогайлов сүүмэрдээһини ситиһиилээхтик ааһан үлэҕэ ылыллыбыт.

—Үлэнэн хааччыйыыга көмөлөспүттэригэр пуонда филиалыгар улаханнык махтанабын. Миэхэ бу улахан суолталаах хардыынан буолар. Маннык кыах бэриллибититтэн наһаа үөрэбин. Өйөбүлгүт иһин махтал, — диэн этэр Юлиан Смогайлов.

Үлэнэн хааччыйыы — «Аҕа дойдуну көмүскээччилэр» пуонда биир сүрүн хайысхата. Социальнай координатордар байыаннай дьайыы бэтэрээннэригэр үлэни көрдүүргэ, ону сэргэ олоххо тирэхтээх, инникигэ эрэллээх буолалларыгар көмөлөһөллөр диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/17452