Байыаннай дьайыы бэтэрээнэ Физкултуураны уонна успуорду сайыннарыы киинигэр үлэҕэ киирдэ

Станислав 2023 сыллаахха баҕа өттүнэн байыаннай дьайыыга кытта барбыта. Хантараага бүппүтүн кэнниттэн, ытык иэһин толорон дойдутугар төннүбүтэ. Байыаннай дьайыыга барыан иннинэ кини баһаарынай чааска үлэлиирэ. Аны билигин кини үлэтин уларытарга сананан, Горнай оройуоннааҕы бу боппуруоһунан дьарыктанар социальнай координаторга тиийбит.

Социальнай координаторынан үлэлиир Алексей Захаров бу боппуоруоһы кылгас кэм иһигэр быһааран, байыаннай дьайыы бэтэрээнэ билигин Горнай улууһунааҕы Физическэй култуура уонна маассабай успуорт сайдыытын киинигэр исписэлииһинэн үлэлии сылдьар. Станислав успуорду тарҕатыыга көхтөөх үлэни ыытар, спортивнай тэрээһиннэри тэрийэргэ төһүү күүс буолар.

Санатан суруйдахха, Ил Дархан Айсен Николаев Ил Түмэҥҥэ туһаайан этиитигэр байыаннай дьайыы кыттыылаахтара дьиэлэригэр кэлэн социальнай адаптацияны ааһалларын ситиһэргэ биир сүрүн соругу туруорбута.