Байыаннай дьайыы бэтэрээнэ Томпо улууһун үөрэнээччилэрин кытта көрүстэ

Хаандыгатааҕы Оҕо айымньытын киинигэр иитиллээччилэр байыаннай дьайыы кыттыылааҕа Гаврил Наумовы кытта көрүстүлэр, диэн www.sakha.gov.ru иһитиннэрэр.

Тэрээһин Томпо улууһугар биллэриллибит Ахтыы уонна сомоҕолоһуу сылын чэрчитинэн ыытылынна диэн «Аҕа дойдуну көмүскээччилэр» байыаннай дьайыы кыттыылаахтарын өйүүр судаарыстыбаннай пуонда Саха сиринээҕи филиалыгар бэлиэтээтилэр.

Бойобуой дьайыылар бэтэрээнэ, «Аҕа дойду иннигэр үтүөлэрин иһин» II истиэпэннээх уордьан мэтээлин уонна «Бойобуой үтүөлэрин иһин» мэтээл кавалера Гаврил Наумов оҕолорго бэйэтин баҕатынан фроҥҥа барар быһаарыныытын, бэлэмнэнии уонна бастакы күннэр ыарахаттарын туһунан кэпсээтэ.

Бэргэнник ытар дьоҕурдааҕын билэннэр, кинини снайпердар подразделениеларыгар анаабыттар. Гаврил үөрэнээччилэргэ сулууспатын, фроҥҥа доҕордоһуу туһунан кэпсээннэрин, ону таһынан походнай кухуньа астарын ырысыабын кытта үллэһиннэ. Көрсүһүү кэмигэр Бойобуой дьайыылар бэтэрээннэрин сэбиэтин бэрэссэдээтэлэ Юрий Захаров Оҕо айымньытын киинин түмэлигэр АЛСИБ трассатын сөмөлүөттэрэ саахалламмыт сирдэринэн эспэдииссийэ кэмигэр булуллубут булумньулары туттарда. Оттон «Аҕа дойдуну көмүскээччилэрэ» пуонда Саха сиринээҕи филиалын социальнай координатора Нина Стенина дьаһалга устуоруйаны, өйдөбүлү харыстыыр суолталааҕын бэлиэтээтэ.

Кэпсэтии түмүгэр Киин дириэктэрэ Ольга Павлова ыалдьыттарга иитиллээччилэр бэлэхтэрин — оҕолор илиилэринэн оҥорбут харысхалларын туттарда.

Санатан эттэххэ,  сыл саҕаланыаҕыттан «Аҕа дойдуну көмүскээччилэр» судаарыстыбаннай пуонда Саха сиринээҕи филиалын көмөтүнэн бойобуой дьайыылар бэтэрээннэрэ уонна байыаннай дьайыыга өлбүт кыттыылаахтар дьиэ кэргэттэрин чилиэннэрэ кыттыылаах 300-тэн тахса уопсастыбаннай тэрээһин ыытылынна. Тэрээһиннэргэ 24 тыһыынчаттан тахса киһи хабылынна.