Байыаннай дьайыы бэтэрээнэ зоотехнигынан үлэлиэҕэ

Байыаннай дьайыы бэтэрээнэ Спиридон Колесов Арктикатааҕы агротехнологическай судаарыстыбаннай университекка үөрэнэн, «зоотехник» идэтин баһылаары сылдьар. Салгыы талбыт идэтинэн үлэлиир былааннаах диэн СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.

Байыаннай дьайыы иннинэ Эбээн Бытантайтан сылдьар Спиридон Колесов «Саха сүөһүтэ» тэрилтэҕэ үлэлээбит уопуттаах. Дойдутун көмүскүү хантараак баттаһан барбыта.

Бойобуой сорудаҕы толоро сылдьан улаханнык бааһыран, өр кэмнээх эмтэниини ааспыта. Билигин Спиридон дойдутугар төннөн, «Аҕа дойдуну көмүскээччилэр» пуондаҕа көмө көрдөөн тиийбитэ.

Кини координаторын Анна Шишунова көмөтүнэн бааһырбытынан биир кэмнээх уонна салгыы ылар төлөбүрдэрин докумуоннаспыта. Итиэннэ бэтэрээн спортивнай протез ыларыгар уонна үлэҕэ киирэригэр пуонда күүс-көмө буолбута.