Байыаннай дьайыы бэтэрээнин дастабарыанньата бэриллэр саҥа сокуон ылылынна

Судаарыстыбаннай Дуума дьокутааттара иккис уонна үһүс бүтэһик ааҕыыларга Херсон уонна Запорожье уобаластарын байыаннай-гражданскай дьаһалларыгар алта ыйтан итэҕэһэ суох үлэлээбит дьоҥҥо байыаннай дьайыы бэтэрээнин дастабарыанньата бэриллэр сокуону ылыннылар. Бу туһунан Ил Түмэн пресс-сулууспата иһитиннэрэр.

Ону тэҥэ, бу дьаһаллар быһаарыыларынан, Украина территорияларыгар, ол иһигэр Запорожье уонна Херсон уобаластарыгар, анал байыаннай дьайыы сорудаҕын толорууну хааччыйбыттар.

Итини таһынан Украина, Донецкай уонна Луганскай Норуодунай Өрөспүүбүлүкэлэр территорияларыгар 2022 сыл олунньу 24 күнүттэн  итиэннэ Запорожье уонна Херсон уобаластарыгар 2022 сыл балаҕан ыйын 30 күнүттэн дэлби эстэр биридимиэттэри көрдөөһүҥҥэ уонна суох оҥорууга кыттыбыт Ыксаллаах быһыы-майгы министиэристибэтин үлэһиттэрэ бойобуой бэтэрээн статуһун ылыахтара.

Оттон маннык үлэни толоро сылдьан, эт-хаан эчэйиитин ылан, инбэлиит буолбут түгэнигэр эбэтэр эмсэҕэлээһини ылбыт буоллаҕына, байыаннай дьайыы инбэлиитин быһыытынан билиниллиэҕэ.