Электроннай дастабырыанньа оҥотторуохтарын сөп

Бойобуой дьайыы кыттыылаахтара электроннай дастабырыанньаны оҥотторуохтарын сөп.

Бу туһунан СӨ Бырабыыталыстыбатын Бэрэссэдээтэлин солбуйааччы Георгий Степанов иһитиннэрдэ.

«Бу каарта бойобуой дьайыы бэтэрээнин официальнай дастабырыанньатынан буолар. Бу былааҥкаҕа толоруллубут дастабырыанньаны кытары тэҥ дастабырыанньа. Каартатын көмөтүнэн бойобуой дьайыы бэтэрээнэ көрүллүбүт чэпчэтиилэри ылыан сөп, ону таһынан баан каартатын курдук туһаныан эмиэ сөп. Электроннай дастабырыанньаны судаарыстыбаннай өҥөнү оҥорор «Госуслуги» нөҥүө оҥотторуон сөп. Эбэтэр «Промсибээсбааҥҥа» ыйыталаһыан сөп. Бу бааны кытта РФ оборуонатын министиэристибэтэ уонна СӨ Бырабыыталыстыбата хардарыта сибээстээх үлэлииргэ сөбүлэһии түһэрсибиттэрэ«, — диэн быһаарар Георгий Степанов.

Маны таһынан, Саха сиригэр байыаннай сулууспалаахтарга аадырыстаах көмө оҥоһуллуута салҕанар — байыаннай дьайыы кыттыылаахтарыгар уонна кинилэр дьиэ кэргэттэригэр. Бүгүҥҥү күн туругунан 177 дьиэ кэргэҥҥэ дьиэлэрин гаастааһыҥҥа материальнай көмө оҥоһуллубут, байыастар дьонноругар — 575 киһиэхэ санаторийга-куруорка эмтэнэллэригэр көмө оҥоһуллубут, 417 киһи байыаннай сулууспалаах эмтэнэр сиригэр тиийэригэр материальнай көмөнөн туһаммыт. 1066 байыас уонна кинилэр дьиэ кэргэттэрин 1869 чилиэнэ доруобуйа харыстабылын тэрилтэлэригэр доруобуйаларын чэбдигирдиммиттэр.

Нэһилиэнньэ дьарыктаах буолуутун кииннэригэр 657 киһи үлэ ыйыталаспыт. Мантан 231 байыаннай дьайыы кыттыылааҕа уонна 426 кинилэр дьиэ кэргэттэрин чилиэннэрэ буолаллар. 154 киһи үөрэххэ ыытыллыбыт, 408 киһи үлэнэн хааччыллыбыт.

Санатан эттэххэ, Ил Дархан Айсен Николаев Ил Түмэҥҥэ Анал этиитигэр байыаннай дьайыы кыттыылаахтарыгар социальнай адаптация улахан суолталааҕын туһунан этэн турар.

«Биһиги байыастарга өйөбүл буолуохтаахпыт. Хас биирдии байыас чөлгө түһэригэр көмөлөһүөхтээхпит. Үлэ боппуруоһун быһаарыахтаахпыт. СӨ Бырабыыталыстыбатыгар, улуустар баһылыктарыгар байыаннай сулууспалаахтар бары хайысханан адаптацияны баралларыгар үлэни күүһүрдэргэ соруйабын«, — диэн эппитэ.

Сиһилии https://www.sakha.gov.ru/news/front/view/id/3482637  көрүөххэ сөп.

СӨ Ил Дарханын уонна Бырабыыталыстыбатын пресс-сулууспата