Байыаннай дьайыы бэтэрээннэрэ бэйэлэрин дьыалаларын арыйарга граннары ыллылар

«Мой бизнес» киин «СВОй бизнес» бырагырааматынан үөрэҕи ситиһиилээхтик ааспыт байыаннай дьайыы бэтэрээннэрэ бэйэлэрин дьыалаларын саҕалыырга граннары ыллылар. Бу туһунан Урбаан, эргиэн уонна туризм министиэристибэтэ иһитиннэрэр.

Алексей Захаров 200 тыһыынча солкуобайдаах грант хаһаайына буолла. Кини бырайыага «Акваполимер» полимер иһиттэрин оҥорон таһаарыыга олоҕурар  диэн sakha.gov.ru суруйар.

«„СВОй бизнес“ бырагыраамаҕа кыттан, урбаан кистэлэҥнэрин дириҥник өйдөөтүм, бэйэм дьыалабын саҕалыырга наадалаах ньымалары баһылаатым уонна уопуттаах эспиэрдэртэн сыаналаах сүбэлэри ыллым. Ылбыт граны „Акваполимер“ полимер иһиттэрин оҥорор бырайыакпын саҕалыырга туһаныахпын баҕарабын. Кыайыы инники диэки баран иһэргэ кынаттыыр, ырыынакка наадалаах, хаачыстыбалаах бородууксуйаны оҥоруохпун баҕарабын. Сайдар уонна идэтийбит үлэһит быһыытынан үүнэр кыаҕы биэрбит тэрийээччилэргэ махтанабын», — диэн «СВОй бизнес» бырагыраама кыайыылааҕа Алексей Захаров санаатын үллэһиннэ.

Үөрэх бырагырааматын икки кыттааччытыгар 100-түү тыһыынча солкуобайдаах анал граннар туттарылыннылар. Амма улууһуттан Александр Заровняев мас эрбэтиитинэн дьарыктаныа, оттон Дьокуускайтан Андрей Шелковников — таһаҕаһы тиэйиинэн.

«Мой бизнес» кииҥҥэ бэлиэтээбиттэринэн, байыаннай дьайыы кыттыылаахтарыттан тахсыбыт урбаанньыттарга хас биирдии түһүмэххэ тус бэйэлэригэр анаан көмө оҥоһуллар — урбаан кистэлэҥнэригэр үөрэтииттэн уонна биисинэһи регистрациялааһынтан саҕалаан, ону сайыннарыыга уонна кэҥэтиигэ тиийэ. Дьыалаларын аспыттарын кэннэ, өйөбүл бары көрүҥнэрэ хаалаллар. Ол иһигэр Урбаан, эргиэн уонна туризм министиэристибэтин көмөтүнэн сүбэ-ама, үөрэтэр бырагыраамалар, стажировкалар уонна дьыалабыай көрсүһүүлэргэ кыттыы киирэллэр. Ол курдук, 2025 сылга «Мой бизнес» киин үлэһиттэрэ байыаннай дьайыы кыттыылаахтарыгар уонна кинилэр дьиэ кэргэттэригэр 38 биисинэс-былааны оҥорон биэрдилэр.