Байыаннай дьайыы бэтэрээннэрэ гражданскай дуоһунастарга ананыахтара

Байыаннай дьайыыттан эргиллэр буойуннар эйэлээх олоххо сөптөөх миэстэни ылыахтаахтар. Бу бэлиитикэ биир холобурунан Арассыыйа Дьоруойа Николай Соболев буолар, кини Саха сирин Ил Дарханын каадырдары бэлэмнээһини сүрүннүүргэ көмөлөһөөччүтүнэн ананна. Бу туһунан «Быһа кэпсэтии» биэрии эпииригэр СӨ Ил Дархана Айсен Николаев эттэ.

«Биһиги өрөспүүбүлүкэбит сайдан иһэр экэниэмикэтигэр, бүтүн дойду экэниэмикэтигэр каадырдары бэлэмнээһин бастакы суолталаах соругунан буолар. Технологиялар уларыйаллар, хайа-хостуур бырамыысыланнастан саҕалаан тыа хаһаайыстыбатыгар тиийэ бары салааларга сыыппаралааһын, оҥоһуу өй, араас пилота суох көтөр тиһиктэр көхтөөхтүк туттуллалларын көрөбүт, оробуочай идэлэргэ ирдэбил үрдүүр уонна каадырдары бэлэмнээһин систиэмэтэ уларыйар. Манна биһиги дойдубут бу хамсааһынтан туора туран хаалар бырааба суох», — диэтэ СӨ Ил Дархана Айсен Николаев.

Өрөспүүбүлүкэ баһылыга бэлиэтээбитинэн, РФ Бэрэсидьиэнэ Владимир Путин Судаарыстыбаннай сэбиэт мунньаҕар каадырдары бэлэмнээһини саамай суолталаах соруктартан биирдэстэринэн ааттаабыта уонна эрэгийиэннэр баһылыктарыгар каадыр боппуруостарынан дьарыктанар көмөлөһөөччүлэри аныыр туһунан сорудаҕынан туһаайбыта.

«Мин тутатына, бу дуоһунаска «Дьоруойдар кэмнэрэ» («Время героев») бэрэсидьиэн бырагырааматынан үөрэнэр биһиги уолаттарбытын аныыр куһаҕана суох буолуо диэн санааҕа кэлбитим», — диэн бэлиэтээтэ Николаев. Айсен Николаев иһитиннэрбитинэн, Арассыыйа Дьоруойа Николай Соболев Саха сиригэр үлэлиир баҕа санаатын хаста да биллэрбитэ уонна бу этиини үөрэ-көтө ылыммыта.