Байыаннай дьайыы бэтэрээннэрэ Хорсун буолуу уруогу ыыттылар

«Дабаан» оҕо сынньалаҥ уонна чэбдигирэр лааҕырыгар Чурапчы улууһугар социальнай координатор Сергей Атласов көмөтүнэн байыаннай дьайыы бэтэрээннэрин кытта көрсүһүү тэрилиннэ.

Байыаннай дьайыы кыттыылаахтара «Аҕа дойдубар сулууспалыыбын» Бүтүн Арассыыйатааҕы сырдатар аахсыйа чэрчитинэн үөрэнээччилэргэ Хорсун буолуу уруогу ыыттылар.

Бэтэрээннэр Василий Лукин уонна Анатолий Манасытов оҕолорго сулууспаларын туһунан ахтыыларын кытта үллэһиннилэр, дьиҥнээх тулуур, бырааттыы буолуу уонна Ийэ дойдуга таптал  туһунан кэпсээтилэр.

Тэрийээччилэр иһитиннэрэллэринэн, кэпсэтии истиҥ уонна долгутуулаах буолла – оҕолор араас ыйытыылары биэрдилэр: бойобуой наҕараадалар, фроннааҕы олох-дьаһах уонна Аҕа дойду көмүскээччитэ буолар туох суолталааҕын туһунан. Кинилэр этэллэринэн, элбэх оҕо чугас дьоно билигин  байыаннай дьайыыга кыттар буолан, кинилэргэ кэпсээннэр көннөрү хорсун буолуу уруоктара эрэ буолбакка,  ордук долгутуулаах буоллулар. «Маннык көрсүһүүлэр – дьиҥнээх патриоттары иитиигэ саамай суолталаах хардыы. Оҕолор инники көлүөнэ хорсун быһыыларын өрүү өйдүөхтэрэ уонна дойдуларынан киэн туттуохтара», – диэн Сергей Атласов бэлиэтээтэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.