Байыаннай дьайыы бэтэрээннэрэ сыал ытыытыгар күрэхтэстилэр

Чурапчы улууһугар «Боотур Уус» стадиоҥҥа пневматическай бинтиэпкэнэн сыалы ытыыга күрэхтэстилэр. Бу туһунан «Аҕа дойдуну көмүскээччилэр» пуонда эрэгийиэннээҕи салаатыттан иһитиннэрдилэр.

Күөн күрэһи Чурапчытааҕы физкултуура уонна успуорт института тэрийбит. Күрэхтэһиигэ байыаннай дьайыы бэтэрээннэрэ, доруобуйаларыгар хааччахтаах дьон уонна адаптивнай успуорт куурсугар сылдьааччылар кыттыбыттар.

Күрэхтэһии буолуон икки күн иннинэ, бары кыттааччыларга анаан уопуттаах тириэньэр Роман Аржаков салалтатынан үөрэтэр-эрчийэр дьарыктар ыытыллыбыттар.

Сергей Атласов, Чурапчы улууһугар «Аҕа дойдуну көмүскээччилэр» пуонда филиалын социальнай координатора:

— Бойобуой дьайыылар бэтэрээннэрэ күрэхтэһиигэ кыттарга тута сөбүлэспиттэрэ. Маннык турнирдар кыраҕы харахтаах, бэргэнник ытар дьон бэйэлэрин көрдөрөллөрүгэр кыаҕы биэрэр. Күрэхтэһиигэ бары ох курдук оҥостон кэлбиттэрэ. Бэтэрээннэрбит үчүгэй түмүгү көрдөрдүлэр, — диэн этэр.

Бастакы бөлөххө турнир кыайыылааҕынан байыаннай дьайыы кыттыылааҕа Василий Лукин буолбут. Иккис миэстэни байыаннай дьайыы бэтэрээнэ Анатолий Манасытов ылбыт. Үһүс бириистээх миэстэҕэ эмиэ бэтэрээн Эдуард Захаров тахсыбыт.

Доруобуйаларынан хааччаахтаах дьон бөлөхтөрүгэр бастыҥ түмүгү Вячеслав Васильев көрдөрбүт. Иккискэ Екатерина Федорова, үһүскэ Эдуард Кардашевскай тахсыбыттар.

Адаптивнай успуорт куурсун истээччилэриттэн Павел Кирсанов кыайыы көтөллөммүт, иккис, үһүс миэстэлэри Василий Габышев уонна Николай Пермяков ылбыттар.

Турнир бары кыайылаахтара уонна призердара мэтээллэринэн, дипломнарынан наҕараадаламмыттар, бириистэр туттарыллыбыттар.

Сиһилии: https://www.sakha.gov.ru/news/15597

СӨ Ил Дарханын уонна Бырабыыталыстыбатын пресс-сулууспата

Хаартыска: https://web.telegram.org/k/#@gosfondyakutia