Байыаннай дьайыы бэтэрээннэригэр бэйэ дьыалатын саҕалыырга микрокирэдьиит биэрэллэр

Саха сиригэр байыаннай дьайыы бэтэрээннэрэ буолбут урбаанньыттары өйүүр кэккэ миэрэлэр олоххо киирэллэр. Федеральнай уонна эрэгийиэннээҕи былаастар, «Аҕа дойдуну көмүскээччилэр» судаарыстыбаннай пуонда бииргэ үлэлэһиилэрин түмүгэр,  байыаннай дьайыы кыттыылаахтара уонна кинилэр дьиэ кэргэттэрэ бэйэ дьыалаларын арыйалларыгар үөрэтэр бырагыраамаларынан, үбүнэн-харчынан, өйөбүлүнэн уонна сүбэнэн-аманан, көмөнөн туһанар кыахтаналлар.

Ол курдук, Саха сиригэр байыаннай дьайыы кыттыылаахтара буолбут урбаанньыттарга микро-үбүлээһин анал усулуобуйалара үлэлииллэр. Бэйэлэрин биисинэстэрин саҥа саҕалыыр дьоҥҥо «СТАРТ» бородуугунан 2 мөл. солк. диэри суумаҕа сылга 1% ыстаапкалаах кирэдьиит көрүллэр. Оттон номнуо үлэлиир урбаанньыттар «Бизнес» көрүҥүнэн 5 мөл. солкуобайга диэри ылар кыахтаахтар — сылга 5% ыстаапкалаах кирэдьиит бэриллэр.

«Бүгүҥҥү күҥҥэ СӨ Урбааны сайыннарар пуондата байыаннай дьайыы кыттыылаахтарыгар «Бизнес» микро-үбүлээһин бырагырааматынан уопсайа 7,5 мөл. солкуобай суумалаах 4 микрокирэдьиити биэрдэ», – диэн Урбаан министиэристибэтигэр иһитиннэрдилэр.

Бу өйөбүлү ылбыт дьонтон биирдэстэринэн Сунтар улууһуттан төрүттээх урбаанньыт Николай Гоголев буолар. Кини байыаннай дьайыы кэмигэр «БАРС» 2-с добровольческай этэрээтигэр гранатометчигынан сулууспалаабыта уонна «Хорсунун иһин» мэтээлинэн наҕараадаламмыта.

Бу сыл алтынньы ый саҥатыгар Урбааны сайыннарар пуонда Николай Гоголевка эргитэ сылдьар үбүн-харчытын толороругар уонна таһаҕас таһар микрооптуобус атыылаһарыгар «Бизнес» бырагырааманан 4 мөл. солкуобай кээмэйдээх икки чэпчэтиилээх сыаллаах кирэдьиити биэрдэ.

«Дойду салалтата, Бэрэсидьиэн Владимир Путин бэйэ дьыалатын арыйар байыаннай дьайыы бэтэрээннэригэр улахан болҕомтону уурара олус үчүгэй. Ол курдук, бүгүн биһиги өрөспүүбүлүкэбитигэр бэйэтин дьыалатын саҥа саҕалыыр, ону тэҥэ номнуо үлэлиир урбаанньыттарга чэпчэтиилээх микрокирэдьииттэр бааллара кэрэхсэбиллээх», – диэн Николай Гоголев санаатын үллэһиннэ.

«СВОй бизнес» федеральнай үөрэтэр бырайыак судаарыстыба өйөбүлүнэн бэйэ биисинэһин саҕалыырга уонна сайыннарарга наадалаах урбаан үөрэҕин баһылыыргы уонна сайыннарыыга туһуланар. Саха сиригэр бу бырайыак быйыл аан бастаан ыытыллыаҕа. Биэс күннээх үөрэх чэрчитинэн байыаннай дьайыы бэтэрээннэригэр урбаан төрүөттэрин үөрэтии, биисинэс-идиэйэни талыы уонна оҥоруу, көдьүүстээх биисинэс-былааны оҥоруу ыытыллыаҕа.

Бырайыакка кыттарга сайаапкалар алтынньы 2 күнүттэн 29 күнүгэр диэри мсп.рф/services/SVOy_business/ сигэнэн тутуллаллар. Үөрэх сэтинньи 10 күнүттэн 14 күнүгэр диэри Дьокуускайга ыытыллыаҕа. Бырайыагы «Биир ньыгыл Арассыыйа» Бүтүн Арассыыйатааҥы  бэлитиичэскэй баартыйа, «Опора России» дьоҕус уонна орто урбаан уопсастыбаннай тэрилтэтэ, «КМС корпорацията» акционернай уопсастыба уонна СӨ Урбаан, эргиэн уонна туризм министиэристибэтин салайыытынан «Мин биисинэһим» киин тэрийэн ыыталлар. Бастыҥ бырайыак бэйэтин биисинэһин сайыннарарыгар 200 тыһыынча солкуобай кээмэйдээх граны ылыаҕа. Сиһилии https://www.sakha.gov.ru/news/13880 саайтка ааҕыҥ.