Байыаннай дьайыы бэтэрээннэрин анал киэптээх таҥаһынан хааччыйаллар

 «Аҕа дойдуну көмүскээччилэр» судаарыстыбаннай пуонда Саха сиринээҕи филиала Хорсунун иһин уордьан уонна Суворов мэтээлин кавалерын Владислав Кардашевскайы анал киэптээх таҥас комплегынан хааччыйда диэн пуонда филиалыгар иһитиннэрдилэр.

Бэтэрээн сулууспата 2022 сыллаахха, устудьуон эрдэҕинэ, дойду интэриэһин көмүскүүргэ быһаарынан бэйэтин баҕатынан байыаннай дьайыы зонатыгар барбытыттан саҕаламмыта. Биир кыргыһыыга Владислав Кардашевскай ыараханнык бааһырбыт. Уустук эпэрээссийэ уонна уһун кэмнээх чөлүгэр түһэрии кэнниттэн дьиэтигэр төннүбүт, онно киниэхэ дьиэ кэргэнэ улахан өйөбүл буолбут. Бу туһунан www.sakha.gov.ru иһитиннэрэр.

Аныгыскы хардыытынан «Аҕа дойдуну көмүскээччилэр» пуонда Саха сиринээҕи филиалыгар туруорсуута буолбут. Социальнай координатор Евгения Каменяр бэтэрээҥҥэ көмө бары көрүҥүн тэрийбит: чэпчэтиилэри оҥотторууга уонна бойобуой дьайыылар бэтэрээнин дастабырыанньатын ылыыга көмөлөһүүттэн саҕалаан, бары тиксэр төлөбүрдэрин анааһыҥҥа тиийэ. Ону таһынан, байыаска М.К. Аммосов аатынан Хотугулуу-Илиҥҥи федеральнай университекка үөрэҕэр төннөрүгэр көмөлөспүттэр. Социальнай координатор сүбэтинэн кини өрөспүүбүлүкэҕэ бастакылартан биирдэстэринэн следж-хоккейынан дьарыктанан саҕалаабыт.

Билигин байыаннай дьайыы атын бэтэрээннэрин кытта эрчиллэр. «Кыайыы 50 сыла» успуорт дыбарыаһыгар кини Аҕа дойду Дьоруойдарын күнүгэр анаммыт III физкултуурунай-успуорт тэрээһинигэр аан бастаан кыттыбыт. «Билигин үөрэхпэр уонна успуорка болҕомтобун уурабын, оттон дьупулуоммун ылан баран, «Дьоруойдар кэмнэрэ» бырагыраамаҕа эбэтэр маннык үөрэх бырайыактарыгар сайаапкабын хайаан да биэриэм. Салгыы сайдыахпын уонна саҥа үрдүктэри дабайыахпын баҕарабын. Таҥас дьиҥнээхтик анал киэптээх эбит – хаачыстыбатыгар уонна ымпыгар-чымпыгар тиийэ толкуйданыллыбытыгар тута болҕомтобун уурдум. Олус табыгастаах. Пуондаҕа махтал», — диэн Владислав Кардашевскай санаатын үллэһиннэ.

Санатар буоллахха, 2023 сыл от ыйын 30 күнүттэн «Аҕа дойдуну көмүскээччилэр» судаарыстыбаннай пуонда ыараханнык бааһырбыт, инбэлиит бэтэрээннэри анал киэптээх таҥаһынан хааччыйар бырагырааманы олоххо киллэрэр. Хас биирдии комплект бэтэрээн этин-хаанын уратытын уонна наадыйыытын учуоттаан, тус-туһунан тигиллэр. Пуонда харалтатыгар баар дьон таҥас кээмэйин, өҥүн уонна быһыытын бэйэлэрэ талар кыахтаахтар, бу таҥас күннээҕи олоххо кэтиллэригэр эрэ буолбакка, успуордунан дьарыктанарга, үлэҕэ уонна көхтөөх сынньалаҥҥа аналлаах. Анал киэптээх таҥас комплегын хамсанар аппараата кэһиллиилээх, илиитэ-атаҕа быһыллыбыт эбэтэр инбэлиит кэлээскэтинэн сылдьар байыаннай дьайыы хас биирдии бэтэрээнэ ылар кыахтаах. Ол туһугар «Аҕа дойдуну көмүскээччилэр» пуонда эрэгийиэннээҕи филиалыгар сайаапканан туруорсуохха наада.