Байыаннай дьайыы бэтэрээннэрин чөлүгэр түһэрии уонна өйөөһүн: аһаҕас кэпсэтии

Бүгүн Дьокуускайга «Патриот» ыччат киинигэр улахан суолталаах тэрээһин, «Доруобуйаларын чөлүгэр түһэрии уонна өйөөһүн: байыаннай дьайыы бэтэрээннэрин кытта кэпсэтии» диэн тиэмэҕэ аһаҕас кэпсэтии буолан ааста.

Манна өрөспүүбүлүкэ байыаннай дьайыы кыттыылаахтарын уонна книлэр дьиэ кэргэттэрин кытары үлэлиир тэрилтэлэр салайааччылара, ол иһигэр Байыаннай дьайыылар бэтэрээннэрин ассоциациятын бэрэссэдээтэлэ Сулустаан Заболоцкай уонна «Аҕа дойдуну көмүскээччи» пуонда салайааччыта Алексей Александров кыттыыны ыллылар.

Көрсүһүүгэ байыаннай дьайыы кыттыылаахтарын социальнай көмүскэл уонна чөлүгэр түһэрии сытыы боппуруостара көтөҕүлүннүлэр. Бэтэрээннэр бэйэлэрин кыһалҕалаах боппуруостарын, холобур, анаммыт чэпчэтиилэри ылыы, мэдиссиинэҕэ өҥөтүн туһаныы, докумуоннары оҥорторуу уонна хаачыстыбалаах эмтээһининэн хааччыллыы туһунан кэпсээтилэр. Мэдиссиинэ өҥөлөрүн тиийимтиэтин уонна чөлүгэр түһэриигэ бары ороскуоту толуйуу боппуруоһугар ураты болҕомто уурулунна.

Сулустаан Заболоцкай биэдэмэстибэлэр салайааччыларын кытта кэпсэтии суолтатын бэлиэтээтэ, тоҕо диэтэххэ аһаҕастык кэпсэтии нөҥүө эрэ мунньуллубут кыһалҕаны түргэнник быһаарыахха сөбүн эттэ.

«Бу тэрээһиҥҥэ кэлбит ытыктабыллаах кыттыылаахтар, биһиги бэтэрээннэр ассоциациябыт байыаннай дьайыы бэтэрээннэригэр, уолаттарбытыгар көмөлөһүүнэн уонна ханнык баҕарар боппуруостары быһаарыынан дьарыктанар. Ааспыт сыл ахсынньы ыйыгар Арассыыйа бэтэрээннэрин ассоциацията Арассыыйа Социальнай пуондатын кытта бииргэ үлэлээһин туһунан сөбүлэһиини түһэрсибиппит, олус элбэх сонуну биллибит. 2026 сылга байыаннай дьайыы бэтэрээннэрин доруобуйаларын чөлүгэр түһэриигэ уонна да атын боппуруостарга элбэх уларыйыылар киирдилэр. Биһиги ол туһунан атыттарга тиэрдиэхпитин баҕарабыт. Ол иһин бүгүн маннык тэрээһини тэрийдибит», — диэтэ Сулустаан Заболоцкай.

Алексей Александров мустубут дьон болҕомтотун бэтэрээннэр ассоциацияларын уонна эрэгийиэн социальнай сулууспаларын икки ардыгар ситими күүһүрдэр наадатын эттэ. Кини ресурстары көдьүүстээхтик үллэрэргэ уонна байыаннай дьайыы хас биирдии кыттыылааҕар наадалаах көмөнү оҥорорго бииргэ үлэлээһин улахан суолталааҕын бэлиэтээтэ.

«Аҕа дойдуну көмүскээччилэр бары учуокка тураллар. Хас биирдии киһиэхэ пуонда филиалын социальнай сүрүннээччитэ сыһыарыллыбыт буолуохтаах уонна хас биирдии киһи ханнык эрэ боппуруостары быһаарса сылдьыбыт буолуохтаах. Сүрүнэ диэн социальнай өйөбүл миэрэлэринэн уонна атын хайысхаларынан, бары хабыллыбыттара буолуо диэн эрэнэбин, онтон ким эрэ итини билбэт буоллаҕына, бүгүн биһиги эһигини долгутар боппуруостарга барытыгар сүбэ биэриэхпитин сөп. Анал байыаннай дьайыы кыттыылаахтарын ассоциацията өрөспүүбүлүкэҕэ баар буолбута олус үөрдэр. Тоҕо инньэ диибиний, биһиги 2023 сылтан бу хайысханы кэтээн көрбүппүт. Өйдөөҥ, бу федеральнай тиһик. Сотору кэминэн биһиги эмиэ ассоциацияны кытта сөбүлэҥ түһэрсиэхпит диэн эрэнэбин. Хайа баҕарар сөбүлэҥ дьон туһугар үлэлиэхтээх. Ол эбэтэр биһиги бииргэ тэрээһиннэр былааннарын оҥоруохтаахпыт уонна ону, быйылгы 2026 сылга олоххо киллэриэхпит», — диэтэ Алексей Александров.

Ону таһынан, кини өрөспүүбүлүкэтээҕи байыаннай дьайыы бэтэрээннэрин ассоциацияларын уонна Арассыыйа Социальнай пуондатын Саха сиринээҕи салаатын икки ардыгар сөбүлэһии түһэрсиллибитин эттэ. Бу сөбүлэһии миэстэтигэр өйөбүл саҥа механизмнарын олоххо киллэрэргэ көмөлөһүөҕэ. Чуолаан, бэтэрээннэр мэдиссиинэ өҥөтүн ылыыларын уонна социальнай адаптацияларын ааһалларын тупсарыы былааннанар.

Бу тэрээһин судаарыстыбаннай уорганнар уонна уопсастыбаннай тэриллиилэр байыаннай дьайыы тургутуутун ааспыт дьоҥҥо көмөлөһүүгэ күүстэрин түмүүлэрин улахан түһүмэҕинэн буолла.