Байыаннай дьайыы бэтэрээннэрин хамаандата  Дойдуну көмүскээччилэр Куубагар кыттыаҕа

Байыаннай дьайыы бэтэрээннэрин Саха сиринээҕи хамаандата Соҕуруу Сахалиҥҥа Дойдуну Көмүскээччилэр Куубагар кыттыаҕа.

Бэтэрээннэр алта көрүҥҥэ: олорон эрэ волейболга, буулдьанан уонна оҕунан ытыыга, остуол тиэнниһигэр,  пауэрлифтиҥҥа уонна быһаҕы быраҕыыга күрэхтэһиэхтэрэ. Бэтэрээннэр барыахтарын иннинэ саҥа  спортивнай таҥастарын биэрдилэр.

“Барыгытыгар успуорка дьулууру-тулууру уонна эппиэтинэстээх күрэхтэһиилэргэ Саха сирин дьоһуннаахтык көрдөрөргүтүгэр баҕарабын”, — диэн СӨ Ил Дарханын уонна бырабыыталыстыбатын дьаһалтатын салайааччы Георгий Михайлов баҕа санаатын тириэртэ.

Куубак эрчитинэн, Уһук Илин федеральнай уокуругун  эрэгийиэннэр икки ардыларынааҕы патротическай бэстибээлэ  ыытыллыаҕа.

“Маннык киэҥ хабааннаах тэрээһиҥҥэ Саха сирин аатыттан кыттар улахан чиэс. Миэхэ биһиги буойуннарбыт, төрөөбүт дойдуга таптал туһунан ырыалары бэстибээлгэ толорорум улахан суолталаах. Бу – биһиги дойдубутун көмүскээччилэргэ махталы тириэрдэр кыах”, — диэтэ байыаннай дьайыы бэтэрээнэ Дмитрий Татаринов.

П.Ойуунускай аатынан Саха академическай тыйаатырын артыыһа Дмитрий Татаринов буойун-бэйиэт Тимофей Сметанин тылларыгар “Саллаат сүрэҕэ” ырыаны толоруоҕа. Кини 2024 сыллаахха “БАРС-2 Боотур” баҕа өттүнэн барааччылар этэрээттэрин састаабыгар киирэн, байыаннай дьайыыга барбыта. Луганскай Норуодунай Өрөспүүбүлүкэ  сиригэр-уотугар хорсун быһыытын көрдөрбүтэ. Байыаннай сорудаҕы толорууга хорсун уонна быһаарыылаах дьайыыларын иһин ЛНӨ баһылыгын  ыйааҕынан, “Хорсунун иһин” уонна РФ Оборонаҕа министиэристибэтин департаменын     «Генерал-майор Александр Александров» мэтээллэринэн наҕараадаламмыта. Дмитрий хантараага бүтэн, тыйаатырга үлэтигэр төннүбүтэ. Билигин, байыаннай  дьайыы бэтэрээнин быһыытынан, патриоттуу тыыҥҥа иитии үлэтинэн көхтөөхтүк дьарыктанар: байыаннай дьайыы туһунан айымньылары толорор, байыаннай дьайыы кыттыылаахтарын хоһооннорун дорҕоонноохтук ааҕар уонна төрөөбүт дойдуга таптал, дьоруойдуу быһыы туһунан испэктээктэргэ оонньуур.

Байыаннай дьайыы бэтэрээннэрин ортолоругар “Дойдуну көмүскээччилэр куубактара” тэрээһин аан бастаан Сахалин уобалаһыгар ыытыллар. Манна Уһук Илиҥҥи федеральнай уокуруктан 11 субъект кыттыаҕа. Уһук Илиҥҥи түһүмэх кыайыылаахтара Уһук Илиҥҥи федеральнай уокурук сүүмэрдиир хамаандатыгар киириэхтэрэ уонна Бүтүн Арассыыйатааҕы “Дойдуну көмүскээччилэр куубактарыгар” барыахтара.

СӨ Ил Дарханын уонна Бырабыыталыстыбатын пресс-сулууспата