Байыаннай дьайыы боппуруостарыгар биэдэмистибэлэр икки ардыларынааҕы үлэ алгоритмнарын тупсарыахтара

Саха сирин психологтарын пуорумугар бу хайысхаҕа аналлаах стратегическай сессия ыытылынна.

«Мэйии штурмугар байыаннай дьайыы кыттыылаахтарыгар көмө оҥоруутугар кыттар бары биэдэмистибэлэртэн элбэх ахсааннаах исписэлиис, ону тэҥэ Саха сирин араас тэрилтэлэригэр үлэлиир бэтэрээннэр бэйэлэрэ кытыннылар. Сессия түмүгүнэн хас даҕаны этии киирдэ. Инникитин бу этиилэри үлэҕэ киллэриигэ уонна үгүстүк үөскүүр түгэннэргэ холоон көрүүгэ үлэ барыаҕа. Исписэлиистэр сорох структураларга көмөнү ылыы бырассыаһа бюрократияламмытын бэлиэтииллэр», – диэн сэтинньи 28 күнүгэр ыытыллыбыт брифиҥҥэ Дьокуускайдааҕы өрөспүүбүлүкэтээҕи психологическай киин дириэктэрэ Владимир Скрябин кэпсээтэ.

Тэрилтэ дириэктэрэ бэлиэтээбитинэн, психологтар пуорумугар сокуон ирдэбилигэр да, байыаннай сулууспалаахтар уонна кинилэр дьиэ кэргэттэрин наадыйыыларыгар да сөп түбэһэр быһаарыылары көрдөөбүттэр. Пуорумҥа бары үөскүүр уустуктары бииргэ быһаарарга сорук туруоруммуттар. «Ол кэмҥэ, ааспыт нэдиэлэ устата өрөспүүбүлүкэҕэ, ону тэҥэ Ростов-на-Дону куоракка госпиталь хайысхатынан байыаннай дьайыы 330-тан тахса кыттыылааҕа уонна кинилэр дьиэ кэргэттэрэ хабылыннылар, 360 тус-туһунан уонна бөлөҕүнэн психологическай үлэ, ол иһигэр хос консультациялар уонна дьарыктар ыытылыннылар», – диэн дириэктэр иһитиннэрдэ.

Көмөнү уонна өйөбүлү 8 (4112) 31-91-09 (үлэ чааһыгар) нүөмэргэ эрийэн суруттаран ылыахха сөп. Улуустардааҕы Киин филиалларын контактарын бу нүөмэринэн билсиэххэ сөп. Ону таһынан, суукканы быһа үлэлиир итэҕэл төлөпүөнэ баар: 8-800-100-35-50 эбэтэр 122, онтон 6 уонна 2. Байыаннай дьайыы кыттыылаахтарыгар, кинилэр дьиэ кэргэттэригэр, ону тэҥэ атын кризиснэй хайысхаларга тэрилтэ өҥөтө босхо оҥоһуллар. Бу хайысха  СӨ Ил Дархана Айсен Николаев сорудаҕынан, СӨ Бырабыыталыстыбатын Бэрэссэдээтэлин солбуйааччыта Ольга Балабкина тус хонтуруолунан ыытыллар.