Байыаннай дьайыы буойуннарыгар анаан саалары туталлар

Бүгүн Саха сириттэн төрүттээх «Хаҥыл» позывнойдаах байыаннай сулууспалаах Саха сирин олохтоохторугар туһаайан,  байыаннай дьайыы буойуннарыгар өстөөх дроннарын утары охсуһууга көмөлөһөр  саалары туттарарга ыҥырда.

«Хаҥыл» РФ Оборуонатын министиэристибэтиттэн боломуочуйаны ылан, өрөспүүбүлүкэҕэ иккис төгүлүн кэллэ. Сайын саҕаланыытыгар сааны хомуур бастакы түһүмэҕэр Саха сириттэн байыаннай дьайыы буойуннарыгар 320 саа бэриллибитэ.

«Бу саалар “Илин” бөлөх 5-с аармыйатын 394-с мотострелковай полкатын буойуннарыгар бэриллибиттэрэ. Бүгүн полк хас биирдии батальона Саха сириттэн кэлбит  сааларынан сэбилэнэн олорор. Уолаттар биһиги өрөспүүбүлүкэбититтэн тиийбит сааларынан бойобуой сорукка сылдьаллар. Кинилэр Саха сирин дьонугар, тэрилтэлэргэ, өрөспүүбүлүкэ бырабыыталыстыбатыгар улахан махталларын тиэрдэллэр», – диэн байыаннай кэпсээтэ.

Кини бу патриотическай аахсыйаны олоххо киллэриигэ ИДьМ, Росгвардия үлэһиттэрин уонна Донбасска көмө уонна өйөбүл пуондатын улахан кылааттарын бэлиэтээтэ.

«Саа хомуурун саҥа түһүмэҕэр биир эрэ полканы буолбакка, биир бүтүн дивизияны хааччыйар былааннаахпыт. Ол иһин элбэх ахсааннаах сааны хомуйуохха наада. Саха сирин олохтоохторун аахсыйаны өйөөн, биһиги буойуннарбытыгар көмөлөһөргүтүгэр көрдөһөбүн», – диэн байыаннай Саха сирин олохтоохторугар туһаайан эттэ.

Кини саалары доҕорго эбэтэр аймахха аадырыстаан ыытыахха сөбүн  бэлиэтээтэ. «Байыаннай дьайыы буойуннарыгар  сааны туттардахха, болдьоҕо ааспыт докумуон иһин эбэтэр гражданскай сэрии сэбин туһаныыга таһаарыллыбыт атын кэһиилэр иһин бары ыстарааптар уһуллуохтара», – диэн «Хаҥыл» чуолкайдаата.

Дьокуускайга саалары хомуйуу атырдьах ыйын 18 күнүттэн Росгвардия лицензионнай-көнүллүүр үлэҕэ салаатыгар, Дзержинскай уул., 35/1 аадырыһынан саҕаланыаҕа.