Байыаннай дьайыы хонуутугар – «Кыайыы кынаттаах эр хоһуун Хотойдор»

«Кыайыы кынаттаах эр хоһуун Хотойдор» диэн анал байыаннай дьайыы зонатыгар Саха эстрадатын тыйаатырын икки нэдиэлэлээх аһымал тура түмүктэннэ.

Арассыыйа үгүс муусукааннара анал байыаннай дьайыы кыттыылаахтарыгар кэнсиэртэри тэрийэн ыыталлар, саҥа территориялар олохтоохторун иннигэр уонна байыаннай госпиталларга ыллыыллар.  Ю.Е. Платонов аатынан Саха эстрадатын судаарыстыбаннай тыйаатыра бу уустук кэмҥэ эмиэ туора туран хаалбата. Соторутааҕыта байыаннай дьайыы хонуутуттан Аркадий Николаев – Эрхаан төрөөбүт тыйаатырын уонна Саха сирин аатыттан «Кыайыы кынаттаах эр хоһуун Хотойдор» бырагырааманан кыттан дойдутугар эргиллэн кэллэ.

Дойдубут уоскулун көмүскэһэр байыастарбытыгар матырыйаалынай көмө эрэ буолбакка, уйулҕа өттүнэн өйөбүл эмиэ наадалаах. Хонуу кэнсиэртэрин Эрхаан билигин дойдутун, дьонун-норуотуун туһугар туруулаһар биһиги биир дойдулаахтарбытыгар, бырааттарбытыгар, уолаттарга, эр дьоҥҥо, аҕаларга анаата…

«Эрхааны дьиҥнээхтик Кыайыы ырыаһыта диэххэ сөп! Кини ырыалара олус патриотическайдар уонна ис киирбэхтэр. Кини айымньылара барыта бойобуой тыыны өрө көтөҕөргө, хас биирдии  байыас бэйэтин күүһүгэр итэҕэйэригэр күүстээх санааны биэрэр кыахтаах! Маннык дьоруойдуу айымньылар билигин атын омук сиригэр баар уолаттарбытыгар олус наадалаахтар. Ону таһынан, Эрхаан улахан уола байыаннай дьайыы зонатыгар бастакы күннэриттэн ыла сылдьар. Байыаннай биэлсэр буолан, кини биһиги саллааттарбыт олохторун өрүһүйэр. Эрхаана кэнсиэрэ  – саха киһитин байыаннай сулууспалаахтарга өйөөһүн бэлиэтэ», – эстрада тыйаатырын дириэктэрэ Татьяна Чаранская.

:

Эстрада тыйаатырын Эрхаан кэнсиэрин аһымал тура куораты чөлүгэр түһэрэр үлэ барар сирдэригэр, байыаннай госпиталларга, ону тэҥэ фронт лииньийэтин быһаччы чугас сирдэргэ ыытылыннылар. Арассыыйа Бэрэсидьиэнин быыбарын кэмигэр Эрхаан Мариуполь куоракка сылдьан, куорат олохтоохторун ахсааныгар бэйэтин гражданскай иэһин толорбута. Куоластааһын быыбар сүрүн сокуонугар сөп түбэһиннэрэн тэриллибитэ. Артыыс урут Мариуполь куоракка сылдьан бэйэтигэр хомолтолоох өйдөбүлү хаалларбыта, оттон билигин куоракка саҥа дьиэлэр тэтимнээхтик тутуулара бара турарын бэлиэтиир.

«Куораты чөлүгэр түһэрэр үлэ тэтимин улаханнык сөҕө көрдүм. Докучаевск куоракка биһиги биир дойдулаахтарбыт олорор комплекстары, бибилэтиэкэлэри, култуура дьиэлэрин, офис дьиэлэрин, уо.д.а. туталлар. Кэнсиэр туһунан эттэххэ, биһиги оҕолорбутуттан төттөрү сибээһи ылабыт. Кинилэр бары ис сүрэхтэриттэн махтаналлар, ол курдук ырыаларбытынан төрөөбүт дойдуларыгар ахтылҕаннарын кыратык уоскуттубут дии саныыбын», — диэн эрэнэ саныырын туһунан Эрхаан эттэ.

Видеоны Эрхаан архыыбыттан Юрий Босиков таҥан онордо