Байыаннай дьайыы кыттыылааҕа “Абилимпикс” чөмпүйэнээккэ кыттыаҕа

РФ Үөрэҕириигэ министиэристибэтэ инбэлиит буолбут байыаннай дьайыы кыттыылаахтарыгар анаан идэтийбит маастарыстыбаҕа аан бастакы чөмпүйэнээти тэрийэн эрэр.

Бу РФ бэрэсидьиэнэ Владимир Путин сорудаҕынан ыытыллар “Абилимпикс” национальнай чөмпүйэнээт талар түһүмэҕэр Саха сириттэн Дмитрий Килигин “Массыыналары өрөмүөннээһин уонна көрө сылдьыы” көрүҥҥэ кыттыаҕа.

Билигин Дмитрий Феликсович В.М. Членов аатынан Дьокуускайдааҕы индустриальнай-педагогическай колледж базатыгар уопуттаах уһуйааччы Павел Олесов салалтатынан чөмпүйэнээккэ бэлэмнэнэ сылдьар. Павел Олесов бу үөрэх тэрилтэтин бүтэрэн баран, сэттис сылын устудьуоннарга бэйэтин билиитин биэрэр. Бу кэм устатыгар кини “Абилимпикс” өрөспүүбүлүкэтээҕи түһүмэҕэр икки кыһыл көмүс медалиһы бэлэмнээтэ.

Бастакы чөмпүйэнээт от ыйын 25-29 күннэригэр Казань куоракка буолуоҕа. Күрэхтэһии Казаннааҕы бөртөлүөт собуотун үөрэтэр-производственнай киинин былаһааккатыгар 15 көрүҥҥэ ыытыллыаҕа. Чөмпүйэнээт түмүгүнэн 75 финалист талыллан, аны күһүн алтынньыга финалга көрсүөхтэрэ, диэн иһитиннэрэр Ил Дархан, бырабыыталыстыба пресс-сулууспата.