Байыаннай дьайыы кыттыылааҕа Айаал Лазарев чиэһигэр «Дьоруой паартата» аһылынна

Сэтинньи 20 күнүгэр анал байыаннай дьайыы кыттыылааҕын, Дьокуускай куорат 13-с №-дээх оскуолатын бүтэрбит Лазарев Айаал Альбертович чиэһигэр «Дьоруой паартата» диэн бэлиэ тэрээһин буолан ааста.

«Дьоруой паартата» үөрүүлээх аһыллыытыгар бочуоттаах ыалдьыттар: Дьокуускай куорат Дууматын V ыҥырыылаах дьокутаата, «Дьокуускай куорат аҕаларын сэбиэтэ» уопсастыбаннай тэрилтэ бэрэссэдээтэлин солбуйааччы Яков Оконешников, Дьокуускай куорат дьаһалтатын үөрэҕин управлениетын иитиигэ отделын исисэлииһэ, байыаннай дьайыы бэтэрээнэ, анал байыаннай дьайыы кыттыылааҕа, “Хорсун быһыы” уордьан кавалера Николай Семенов, Бырамыысыланнай уокурук управатын салайааччыта Дмитрий Захаров, исписэлииһэ Наталья Курбонова, анал байыаннай дьайыы кыттыылааҕа Евгений Кузнецов, Айаал бииргэ төрөөбүт эдьиийдэрэ, аймахтара уонна чугас доҕотторо кыттыннылар. Бочуоттаах ыалдьыттар 2025 сыллаахха анал байыаннай дьайыы зонатыгар бойобуой соруктары хорсуннук толоро сылдьан өлбүт Айаал аймахтарыгар махтал, дириҥ ытыктабыл тылларын эттилэр. Кинилэр эдэр көлүөнэҕэ патриотическай иитии духуобунай, сиэр-майгы сирдьитинэн буоларын бэлиэтээтилэр.

Оскуола дириэктэрэ Иосиф Слепцов кэлбит дьоҥҥо махтал тыллары эттэ, «Дьоруой паартата» аһыллыбыта бүтүн оскуола дьиэ кэргэнигэр бэлиэ түгэн быһыытынан суолталааҕын тоһоҕолоон бэлиэтээтэ. Айаал туһунан сырдык өйдөбүл кэлэр көлүөнэҕэ холобур буолуоҕун эттэ, үтүө дьыалаларга, хорсун быһыыга-майгыга көҕүлүөҕүн, үөрэнээччилэри үрдүк ситиһиилэргэ сирдиэҕин, ону тэҥэ патриотизмҥа, дьоруойдары ытыктыырга үөрэтэргэ төһүү буолуоҕар эрэнэрин биллэрдэ.

«Дьоруой паартата» үөрүүлээх быһыыга-майгыга аһыллар быраабын юнармейскай кылааска бэрилиннэ.

«Дьоруой паартатыгар» бастакынан олорор бочуоттаах быраап 11-с кылаас үөрэнээччилэригэр – үөрэх туйгуннарыгар, куорат, өрөспүүбүлүкэтээҕи уонна бүтүн Арассыыйатааҕы куонкурстар, научнай-практическай конференциялар призердарыгар уонна кыайыылаахтарыгар, дойду оҕолорун уонна ыччатын хамсааһынын «Бастакылар хамсааһыннараын» маҥнайгы салаатын активистарыгар: Сайаара Никитинаҕа уонна Николай Гребенниковка бэрилиннэ.

Айаал Лазарев үөрэнэр кэмигэр кэллэктииби кытта чэпчэкитик биир тылы булара, оскуола олоҕор көхтөөхтүк кыттара, ситиһиилээх үөрэнээччи быһыытынан биллэрэ. Уруокка Айаал болҕомтолоохтук сыһыаннаһара, кылаас оҕолоругар көмөлөһөрө. Кини үтүө санаалаах, үөрүнньэҥ, сэмэй майгылааҕа, саастыылаахтара да, педагогтартара да ытыктыыллара.

«Дьоруой паартата» диэн үөрэхтээһин бырайыага «Биир ньыгыл Арассыыйа» баартыйа уонна «Арассыыйатааҕы норуот фрона» хамсааһын көҕүлээһининэн элбэх эрэгийиэҥҥэ олоххо киирэр.