Байыаннай дьайыы кыттыылааҕа Алексей Лупеев үөрэнээччилэри кытары көрүстэ

Дьокуускайга   Михаил Николаев аатынан 40 нүөмэрдээх оскуолаҕа “Ыччат уонна оҕолор” национальнай бырайыак чэрчитинэн “Зимняя школа навигаторов детства” үөрэхтээһин IV симиэнэтэ буолан ааста.

Бу тэрээһиҥҥэ “Аҕа дойдуну көмүскээччилэр” пуонда салаатын өйөбүлүнэн, байыаннай дьайыы бэтэрээнэ, социальнай сүрүннээччи уонна “Билии” Арассыыйа уопсастыбатын лиэктэрэ Алексей Лупеев кытынна.

Кини дойдуга бэриниилээх буолуу сыаннастарын уонна ыччаты иитиигэ настаабынньык оруолун туһунан кэпсээтэ.

“Билигин оҕолору кытары чиэһинэй буолуу, ытык иэһи төлөөһүн уонна дойдуга бэриниилээх буолуу курдук уларыйбат сыаннастар тустарынан кэпсэтии суолталаах. Дьиҥнээх настаабынньык – көннөрү кэпсиир эрэ буолбакка, эппиэтинэстээх уонна патриот хайдах буолуохтааҕын бэйэтин  холобурунан көрдөрөр киһи. Биһиги сорукпут – үөрэнээччилэр  устуоруйаҕа ытыктабылга уонна төрөөбүт дойдуга тапталга   олоҕурбут хайысхалары тутуһалларыгар көмөлөһүү”, — диэн Алексей Лупеев бэлиэтээн эттэ.

Хорсунун иһин уордьаннаах Алексей Лупеев 2023 сыллаахха пуруонтан дойдутугар кэлбитэ. Онтон сотору Саха сиригэр “Дойдуну көмүскээччилэр” судаарыстыбаннай пуонда салаата аһыллыахтааҕын, онно байыастартан үлэһиттэр наадаларын  туһунан билэр дьонуттан истибитэ. Алексей Лупеев “Дойдуну көмүскээччилэр” пуондаларыгар үлэтин 2023 сыл бэс ыйын 1 күнүттэн саҕалаабыта.

Кини  дьоҥҥо көмөлөһөр, бэйэ үөрүйэҕин үллэстэр уонна туһалаах буолар кыах бэриллэрин иһин, үлэтин олус сөбүлүүрүн билинэр.

-“Аҕа дойдуну көмүскээччилэр” пуонда байыаннай сулууспаттан кэлбит, судаарыстыба өттүттэн болҕомтолоох сыһыаны эрэйэр дьону өйүүргэ анаан тэриллибитэ”, — диэн Владимир Путин эппитэ.

СӨ Ил Дарханын уонна бырабыыталыстыбатын пресс-сулууспата