Байыаннай дьайыы кыттыылааҕа Павел Моякунов дьиэтэ тутуллан бүтэн эрэр

«Биир ньыгыл Арассыыйа» баартыйа Генеральнай сэбиэтин сэкирэтээрэ Андрей Турчак уонна Саха Өрөспүүбүлүкэтин баһылыга Айсен Николаев бүгүн, балаҕан ыйын 5 күнүгэр, Дьокуускайга бу сыл олунньутугар дьиэтэ уокка былдьаммыт байыаннай дьайыы кыттыылааҕа Павел Моякунов саҥа дьиэтин тутуутун үлэтин көрдүлэр. Дьиэлээхтэр бу ый бүтүүтэ саҥа дьиэлэригэр киириэхтэрэ, малааһыннаары бэлэмнэнэллэр.

Андрей Анатольевич уонна Айсен Сергеевич байыаннай эпэрээссийэ кыттыылааҕын дьиэ кэргэнин — төрөппүттэрин, кэргэнин, оҕолорун кытта кэпсэттилэр. Кинилэр дьиэлэрэ уокка хайдах былдьаммытын, иэдээн бастакы күнүттэн көмө көрүллүбүтүн, саҥа дьиэ тутуутун тэтимин туһунан кэпсэттилэр.

Андрей Турчак СӨ баһылыгар Айсен Николаевка дьиэ тутуутун туһунан суһал быһаарыныыны ылыммытыгар махтанна.

«Үтүө санаа спецназтара» волонтердара уонна баартыйа актыбыыстара бу саас дьиэни тутан саҕалаабыттара. Бүгүн дьиэ бэлэм буолан эрэр диэххэ сөп. Павел дьиэ кэргэнин кытта тутууга кэлэ сырыттыбыт. Икки этээс бэлэм, билигин кырыысаны оҥороллор, уотун тардаллар. Малааһыҥҥа диэри кыра хаалбыт. Дьиэҕэ-уокка туттар тиэхиньикэнэн көмөлөһүөхпүт. Бу дьоллоох түмүктээх көннөрү устуоруйа буолбатах. Маннык хас биирдии байыаннай дьайыы кыттыылааҕын дьиэ кэргэнигэр ханна баҕар уонна хаһан баҕар көмөлөһүөхтээхпит. Фроҥҥа сылдьар хас биирдии байыас кини дьоно көмүскэллээҕин билиэхтээхтэр», — диэн Андрей Турчак бэлиэтээтэ.

Ил Дархан Айсен Николаев байыаннай дьайыы кыттыылаахтара убаастаналларын, уопсастыба да, судаарыстыба да өттүттэн өйөбүл баарын эттэ.

«Маннык быһылааны истэн баран туора турарым сатаммат этэ. Биһиги актыбыыстарбыт илиилэрин араарбакка дьиэ тутуутугар көмөлөһөллөр. Сүрүнэ диэн, Моякуновтар маннык иэдээн кэнниттэн санааларын түһэрбэттэр. Чугаһынан кэмҥэ саҥа дьиэ итиинэн илгийиэ, тупсаҕай буолуо диэн эрэнэбин», — диэ Айсен Николаев эттэ.

Ил Дархан уонна Бырабыыталыстыба дьаһалтатын пресс-сулууспата.