Байыаннай дьайыы кыттыылааҕа Петр Шамаев ыччат дьыалаларын миниистирин дуоһунаһыгар төнүннэ

2024 сыллаахха байыаннай дьайыы зонатыгар байыаннай сулууспаҕа хантараак түһэрсибит Саха сирин ыччат дьыалаларыгар уонна социальнай коммуникацияларга миниистирэ Петр Шамаев бэйэтин эбээһинэһин толорууга хаттаан төнүннэ. Бу туһунан кини Телеграм-канаалыгар иһитиннэрдэ.

“Министиэристибэҕэ өр буолан баран бастакы оробуочай күнүм. Дьэ, көстүүм кэттим, дьикти абҕайы курдук. Планеркаҕа кэлэктиибим улахан аҥаарын билбэтим – саҥа үлэһиттэр баар буолбуттар. Онон, саҥалыы үлэлиэхпит. Ыччат министиэристибэтин үлэтигэр сыһыаннаах көрүүм тосту уларыйда. Хайысхаларбытын чочуйуохпут уонна саҥа үлэ сылыгар бэлэмнэниэхпит. Билигин былааны торумнуохха наада”, — диэн Петр Шамаев суруйда.

Санатан эттэххэ, Петр Шамаев 2024 сыллаахха Ийэ дойдутун көмүскүү байыаннай дьайыыга барбыта. Сулууспатын кэмигэр кини эбээһинэһин Арассыыйа Дьоруойа, “Время Героев” бырагыраама кыттыылааҕа Игорь Юргин толорбута. Кини бу сыл ыам ыйыттан Арассыыйа Үөрэҕин министиэристибэтигэр үлэлии барбыта.