Байыаннай дьайыы кыттыылааҕа «Саха Боотур» байыаннай-патриотическай киини тэрийдэ

Хаҥалас улууһугар «Саха Боотур» диэн байыаннай-патриотическай киини бойобуой дьайыы кыттыылааҕа Андрей Артамонов — Малдьаҕар Бөртө тэрийдэ. Бу туһунан «Хаҥалас» хаһыат суруйда.

Андрей Юльевич Арассыыйаҕа бойобуой ускуустубалар сойуустарын бэрэстэбиитэлэ, кикбоксиҥҥа СНГ үтүөлээх тириэньэрэ, Хаҥалас улууһун II Малдьаҕар нэһилиэгин бочуоттаах гражданина. Кини байыаннай дьайыы зонатыгар «Союз Каскад» добровольческай этэрээт састаабыгар киирэн сулууспалаабыта.

Дойдутугар эргиллэн кэлэн баран, байыаннай-патриотическай уонна байыаннай дьыалаҕа бэлэмниир киини арыйарга быһаарыммыт. Урут сылгы иитиитинэн дьарыктанар хаһаайыстыбатыгар спортивнай-чэбдигирдэр лааҕыры тэрийэн үлэлэппитэ, билигин байыаннай-патриотическай хайысханан үлэлиир.

—Үүнэр көлүөнэ бары өттүнэн дэгиттэр сайдыылаах буолуохтаах. Кинилэр Ийэ дойдуларын көмүскээччилэринэн буолуохтара. Кинилэри бэлэмниэххэ, эрчийиэххэ, үөрэтиэххэ наада, — диир Андрей Артамонов.

От ыйын саҥатыгар «Саха Боотур» кииҥҥэ Өймөкөөнтөн, Өлөөнтөн, Хаҥаластан уонна Дьокуускайтан барыта 15 оҕо үөрэннэ.

Үөрэх бырагырааматыгар саха норуотун духуобунай култууратыгар сыһыарыы, күрэс төрүт көрүҥнэригэр дьарыктааһын, атынан сүүрдэн иһэн оҕунан ытыы, тимиринэн уһаныы, оттооһун киирэллэр.

Сиһилии: https://www.sakha.gov.ru/news/8321

СӨ Ил Дарханын уонна Бырабыыталыстыбатын пресс-сулууспата

Иван Уйгуров уонна Владимир Григорьев хаартыскаҕа түһэриилэрэ