Байыаннай дьайыы кыттыылааҕа үчүгэйдик көрөр кыахтанна

Офтальмология өрөспүүбүлүкэтээҕи балыыһатыгар  байыаннай дьайыы кыттыылаахтарыгар суһал көмөнү оҥоруу салҕанар. Соторутааҕыта Амма улууһуттан төрүттээх байыаска лазернай коррекцияны босхо оҥордулар.

«Мин байыаннай дьайыыга наводчик-операторынан, танкиһынан сулууспалыыбын. Хараҕым мөлтөхтүк көрөрө сулууспалыырбар олус эрэйдиирэ, сотору-сотору ачыкыбын сүтэрэрим. Уоппуска кэмигэр  байыаннай дьайыы кыттыылаахтарыгар Дьокуускайга эпэрээссийэлэри босхо оҥороллорун туһунан истибитим. Барытын олус түргэнник уонна үчүгэйдик оҥордулар. Эпэрээссийэлэнэн баран быдан үчүгэйдик көрөр буоллум”, — диэн “Гермес” диэн позывнойдаах байыас кэпсээтэ.

Лазернай коррекция эпэрээссийэтин офтальмолог-быраас Иннокентий Белолюбскай оҥордо.

«Биһиги Ил Дархан Айсен Николаев көҕүлээһинин  өйөөн,  байыаннай дьайыы кыттыылаахтарыгар салгыы көмөлөһөбүт. Харах балыыһатыгар лазернай коррекция эпэрээссийэлэрэ босхо оҥоһуллаллар. Хайыы үйэ 100-тэн тахса байыас итинник көмөнөн туһанна. Онуоха наадалаах ороскуоттуур матырыйааллар уонна тэриллэр бааллар”, — диэн Офтальмология өрөспүүбүлүкэтээҕи балыыһатын кылаабынай бырааһа Иван Луцкан быһаарда.