Байыаннай дьайыы кыттыылааҕар өйдөбүнньүк истиэндэ арылынна

Кэбээйи улууһун Куокуй нэһилиэгэр анал байыаннай дьайыыга сырдык тыынын толук уурбут Денис Юрьевич Семенов үтүө аатын үйэтитэр өйдөбүнньүк истиэндэ арыллыыта буолла.

Нэһилиэкпит ыччата, улахан дьиэ аҕа баһылыга Семенов Денис Юрьевич кэргэнинээн сэттэ оҕону төрөтөн-иитэн мааны ыал буолан олорон кэллилэр.

Денис Юрьевич 2023 сыл балаҕан ыйыгар анал байыаннай дьайыыга сүрэҕин баҕатынан дойдутун чиэһин көмүскүү барбыта. 11740 байыаннай чааска снайперынан анаммыта. 2023 сыл ахсынньы  28 күнүгэр Луганскай уобалас Кременная бөһүөлэк анныгар өстөөҕү кытары кырыктаах киирсии түмүгэр, доҕорун быыһаары сырдык тыына быстыбыта. Өлбүтүн кэннэ Арассыыйа Бэрэсидьиэнэ В.В.Путин ыйааҕынан  «Эр санаа» уордьанынан наҕараадаламмыта. Уордьан кини дьиэ кэргэнигэр, оҕолоругар туттарыллыбыта.

Өйдөбүнньүк истиэндэни кэргэнэ Маргарита Николаевна, аҕа баһылык солбуйааччыта Илья Васильевич Семенов, ийэтэ Раиса Афанасьевна Шалыкова, » Дьоһун саас» түмсүү салайааччыта Нина Егоровна Олесова арыйдылар.

Олохтоох дьаһалта аатыттан баһылыгы солбуйааччы Илья Васильевич Семенов, кылааһын салайааччыта Саргылана Николаевна Унарова, » Оҕо саас сирдьиттэрэ» федеральнай бырайыак иһинэн үлэлиир орто оскуола дириэктэрин сүбэһитэ Сардана Иннокентьевна Васильева тыл эттилэр. Бырайыак ааптарынан Нина Егоровна Олесова буолар.

Денис Юрьевич олорбут олоҕо, киһи быһыытынан көнө, ыраас майгыта хас биирдиибитигэр өйбүтүгэр-санаабытыгар уонна сүрэхпитигэр куруук тыыннаах.

Бу арыллыбыт өйдөбүнньүк истиэндэ биһиги эдэр ыччаттарбытыгар, улууспут дьонугар хорсун быһыы үтүө холобура, өйдөбүнньүгэ буолар.

Дьоруойдар өлбөттөр,кинилэр биһиги сүрэхпитигэр уһун үйэлэргэ букатынныы хаалаллар.

Ким да умнуллубат,туох да умнуллубат!

Полина Жергина.