Байыаннай дьайыы кыттыылааҕар көмөлөстүлэр

«Защитники Отечества» пуонда Саха сиринээҕи филиала байыаннай дьайыы кыттыылаахтарыгар уонна кинилэр дьиэ кэргэттэригэр көмөтүн салгыыр.

Ол курдук байыаннай дьайыы бэтэрээнэ Мартин Семеновка оҥоһуллубут көмө үтүө холобурунан буолар. Мартин Семенов 2022 сыллаахха байыаннай дьайыыга ыҥырыллан барбыта. Бойобуой дьайыылары оҥорууга ЛНӨ, ДНӨ, Запорожскай, Херсонскай уонна Курскай уобаластарынан сылдьыбыта. Сулууспатыгар штурмовигынан уонна пулемет наводчигынан сылдьыбыта. Кини «Хорсунун иһин»  мэтээлинэн наҕараадаламмыта. Ону таһынан 83-c гвардейскай десантнай-штурмовой биригээдэ хамандыырыттан грамота туппута.

Сулууспалыы сылдьан иккитэ бааһырбыта.  Байыаннай дьайыыттан кэлэн баран Мартин Семенов «Защитники Отечества» пуондаҕа сибээскэ тахсыбыта. Өйөбүл киниэхэ эрэ буолбакка, бүтүн дьиэ кэргэнигэр оҥоһуллубута. Ол курдук аҕаларын санаторнай-курортнай эмтэниигэ, уолларын мэдиссиинэ өттүнэн чөлгө түһүүгэ, ыарыһах кэргэнин эмтэниигэ ыыппыттара.  Итиэннэ бары наадалаах докумуону ситиһэргэ көмөлөспүттэрэ.  Ол курдук бэтэрээн үлэ көрдөнөрүн туһунан кыһалҕатыгар координатор Полина Дедюкина кинини идэ ылар туһугар анал кууруһу ааһарга сүбэлээбитэ. Онон бу сыл атырдьах ыйыгар Мартин «Мастер-спец» диэн кииҥҥэ сыбаарсык идэтин баһылаата. «РИА-СТРОЙ» тэрилтэҕэ быраактыкатын ааһан бу тэрилтэҕэ үлэҕэ киирдэ. Байыаннай дьайыы бэтэрээнэ пуондаҕа, ону сэргэ координатор Полина Дедюкинаҕа махталын биллэрэр.